Ich Ott der Paenz verieh offenlich an disem brief fuer mich vnd fuer mein hausfrawen vnd fuer alle mein erbn vnd tuen chunt allen den die in an sehent, lesent oder hoerent lesen, daz ich recht vnd redlich ze den zeiten do ich ez wol getuen mochten (!), meinev zwai lehen ze Chogelloch mit alle dev vnd dar zue gehoert oder gehoert hat, besuecht oder vnbesuecht, ze veld vnd ze dorf verchauft han vnd ze chaufen han gebn meinem herren byschof Chu^onraten von Frising vnd sinem gotshaus ze Frising vmb fuemf vnd sybentzig phunt phenig Wiener muens der selben phenig ich vnd mein erbn von meinem vorgenanten herren vnd von sinem gotshaus ze Frising gar vnd gaenczlich verriht vnd gewert sin (!), auf den selben zwain lehen ze Chogelloch Dietmar ist gesezen auf ainem vnd Dyetrich saelig hausfrawe Adhelhait auf dem andern lehen ze den ziten. Ich han mich auch der vorgescriben lehen verzigen vnd auf gebn fuer mich vnd fuer mein erben gar vnd ganczlich meinem egenanten herren byschof Chu^onraten von Frising vnd sinem gotshaus fuer alle ansproch vnd vordrum die ich oder mein erbn zue dem offt genanten lehen heten oder gehaben mohten, als ainer der sinev lehen verchauft oder verchauft hat. Ich vnd min erben svellen auch der vorgescriben lehen scherm vnd gewer sein an aller stat swo oder swenn sin meinem herren von Frising vnd sinem gotshaus ze Frising not ist oder not geschit (!), als reht lehens reht ist in dem lande ze Oesterrich, fuer alle ansproch vnd sol ich oder mein erbn daz tuen an allen chrieg, taet aber ich oder mein erbn des nicht, swelhen schaden des mein herre von Frising oder sin gotshaus ze Frising naem den er oder sein chastner ze Waidhouen der ze den ziten ist, gesagen oder bestaeten mag pei sin trewen vnd pei sin eren, den selben schaden sol ich oder mein erben meinem herren von Frising vnd sinem gotshaus ze Frising gar vnd gantzlich auz rihten vnd ab tuen vnd suellen si daz haben auf aller der hab die wir habn in dem land ze Oesterrich ich vnd mein erben. Vnd daz meinem oft genanten herren vnd sinem gotshaus ze Frising allez daz staet vnd gancz vnd vnzerbrochen belib daz vor gescriben stat, dar veber ze einem vrchund gib ich disen brief versigelt mit meinem insigel vnd mit hern Chu^onrats vnd Hainreichs der Zauchinger brueder insigel vnd mit Jansen des Panzen meins vetern vnd mit Hermans Eysenhouen insigel die si durch meiner bet willen ze einer zevchnues an disen brief habent gelaeit. Der brief ist gebn ze Waidhouen, do man zalt von Christes gepurt drevzehen hundert jar vnd dar nach in dem newn vnd drizigistem jar, an sant Galen tag.

Source Fulltext: ZAHN, Codex Diplomaticus (=FRA II/35, Wien 1871) S. 272-273