Ich Hainreich Sneider ze den zeiten richter ze Waidhouen vergich offenlich an disem brief, daz ich han verchouft vnd ze choufen geben den zwain pfarren ze Holnstain vnd ze Gestnich mein zechenthous daz da gelegen ist an dem Friesenperg in Piberpecher pfarr dacz Wolfgern am Hof. Ich han ouch den zwain pfarren ze choufen geben ein halbs zechenthous daz da gelegen ist in Alhartsperger pfarr dacz Hainreich am Chasten, vnd han den pfarren paiden dev zechenthous verchouft vnd ze choufen geben vmb nevn pfunt alter Wienner pfenning der ich gar vnd genczlich gewert pin von den paiden pfarren, vnd han ouch dev selben zechenthous meinem herren dem abt ze Seidensteten vnd seinem gotshous ouf geben von dem ich dev zechenthous ze lechen het vnd von dem sy von alter lechen sint gewesen, vnd han mich der zechenthous gar vnd genczlich verczigen, vnd zu ainem vrchund han ich den vor genanten zwain pfarren disen prief geben versigelt mit meinem anhangundem insigel. Der brief ist geben ze Waidhofen do man zalt von Christes geburt dreuzechen hundert iar, dar nach in dem vierczchistem iar, an sand Mathie tag des zwelf poten.

Source Fulltext: ZAHN, Codex Diplomaticus (=FRA II/35, Wien 1871) S. 278