Ich Fridreich der Straicher goltsmid vnd purger ze Wyenn vergich offenlich an disem brief allen den di in sehent oder horent lesen, daz ich reht vnd redlich gewert pin alles des, des man mir schuldikch beliben ist an dem chreutz daz ich Vnser vrawen hintz Freysing gemacht han als mein seliger herre her Chunrat von Chlingenwerch bischof ze Freysing an seinen lesten zeiten mit mir schuef, vnd daz selb chreutz chost an vier guldeine vingerl di er auch dar zu schuef und di auch also gantzew dar in in di dyadem verworicht sind, in einem ist ein rubin, in dem andern ein palays, in dem dritten ein saphir, in dem vierden ein topasion, dreu hundert guldein vnd achtzehen guldein, der selben gab mir der e genant mein seliger herre pischof Chunrat von Freysing ztwai (!) hundert guldein, der andern hundert und achtzehen guldein hat mich gewert gar vnd gentzlich von des capitels wegen ze Freysing der erber herre her Emich von Altzay chorherre ze Freysing, also daz ich gar vnd gentzlich gewert pin alles des des man mir schuldich beliben ist an dein chreutz. Ich han auch daz selb chreutz geantwurt dem vorgenanten herren hern Emichen von Altzay als mein herren vnd daz capitel ze Freysing mit mir an irem brief geschaffet habent, vnd mit dem chreutz han auch ich im geantwurt drev vingerl di auch zu dem chreutz geschaffet wurden, di mochten sich dar zu nicht gefugen, daz si dar in verboricht waeren. Vn(d) dar vmb daz ich gar vnd gentzlich gewert sey alles des des man mir von dem chreutz schuldikch beliben ist, gib ich dem capitel ze Freysing disen brief versigelt mit meinem insigel. Der brief ist geben do man zalt von Christs gepuert dreutzehen hundert jar vnd dar nach in dem vier vnd viertzigistem jar, an sand Alexii tag.

Source Fulltext: ZAHN, Codex Diplomaticus (=FRA II/35, Wien 1871) S. 283