Ich V^olreich der Chnoll ze, den zeiten verueser dez spitals ze Oberweltz vnd daz spytal daselbs wir vergehen offenbar mit disem brief allen den die in sehent oder horent lesen, daz wir den zehent gelegen datz sand Joergen den Michel der Zehnner inne gehabt hat, dem got genad, vnd der da dient all jar vierzehen mutt chorn vnd vierzehen muett habern vnd mit andern rechten vnd nutzen die darzu gehorent, dem erwirdigen herren bischolf Petern von Lavent, seinen nachchomen vnd irem gotzhaus wider ze losen geben haben vmb fuemftzig march silbers, ye fuer die march zwen vnd neuen schilling Aglayer ze geben der wir gar vnd gantzlich gewert sein an allen vnsern schaden, vnd antwurten dem vorgenanten bischolf Petern, seinen nachchomen vnd irem gotzhaus den vorgenanten zehent mit alle deu vnd darzue gehoeret wie daz genant ist vnd alz wir in im gehabt haben, auz vnser gewalt, nuetz vnd gewer, in ir gewalt, nutz vnd gewer vnd behalten vns dhain recht daran, vnd schullen da mit iren frum schaffen als mit dem andern ires goczhaus guet wie sy wellen, an all vnser irrung, vnd haben im den brief wider geantwurt den wir von seinen voruodern bischolf Hainrich vnder seinem vnd seinez cappitels insigel dar veber gehabt haben. Dar veber geben wir in disen brief versigelten mit Chunrad von Pederdorf ze den zeiten purchgraf ze Oberweltz vnd mit Hainrich dez Naegel ze den zeiten richter ze Oberwelcz anhangenden insigeln die ir insigel an disen brief gehangen habent durch vnser pet willen in an schaden. Pei der obgenanten richtigung seind gewesen vnd seind gezeugen her Velreich prior datz sand Lamprecht, Chunrad von Pederdorf purchgraf ze Weltz, Herrnan von Meinhartzdorf, Oesel pey dem Tor purger ze Friesach vnd ander erber leut. Der brief ist geben ze Friesach an sand Blasii tag, da ergangen warn von Christes geburd dreuzehen hundert iar, dar nach in dem acht vnd fumfzigistem jar.

Source Fulltext: ZAHN, Codex Diplomaticus (=FRA II/35, Wien 1871) S. 319-320