Ich Chu^onrat der Payer minez gnedigen herren hern Fridrichs von Walse von Walse (!) ze den zeiten diener, tu^on kunt vnd vergich offenlich mit disem brief vmb die lehenschaft der acht hu^oben, die vf dem Weinperg bi Clingenuels vf der Windischen March gelegen sint die Niggel der Gaeul ieczunt innehat, die mir der ewidigen (!) fuerst min gnedigen (!) herr pischof Albreht ze Frisingen von sinen gnaden getan hat, daz ich die selben lehenschaft der der (!) vorgenant aht hu^oben mit dem rehten vzztragen sol minem vorgenant herren pischof Albreht, sinem gozhaus vnd allen sinen lu^oten vnd gu^oten an :allen iren schaden vnd dez selben han ich im min triuwe geben an aidez stat stet ze halten vnd ze laisten dez ich min triuwe geben han. Dez ze vrkuend gib ich disen brief versigelt mit minem aigenn anhangendem insigel vnd mit dez erbern mans Wilhalms von Sperrenberg anhangendem insigel daz er durch miner bett im selb an schaden, wan nv^or zu^o ainer ziugnuezz der vorgeschriben sache an disen brief gehenkt hat. Do daz geschach do zalt man von Christes gebuert driutzehenhundert iar, dar nach in dem ahten vnd fuenfczigestem jar, an dem nehsten Eritag nach sant Katharinen tag.

Source Fulltext: ZAHN, Codex Diplomaticus (=FRA II/35, Wien 1871) S. 324-325