Wy Heinric Bruninc, Jan Spade, Jacob Van Lensele, Jan De Neve, ende Zoedevoet, scepenen vander poort van Vuerne, doen te wetene alle den ghenen die desen tsaertre zullen sien of horen lesen, dat die kerkmeesters vander prochie kerke van S. Niclaus van Vuerne, wie dat zy zyn of wezen zullen, sculdich syn ende sculdich sullen wesen eerachtigen lieden den abdt ende den convente vander abdien S. Niclaus van Vuerne voirseit xx scellinghen paresisen eweliker rente elkes iaers ghedurende, te gheldene iaerlies tenen paimente op onser Vrouwen dach die men heet ter Lichtmisse, al twas ende licht datmen offeren sal of dat comen sal spapen hande in die prochiekerke van S. Nicolaus op onzer Vrouwen dach voorseid, of en ware dat sake dat up dien dach lyc of dode came met lichte ter prochie kerken voorseit, ende dan so soude al twas ende al tlicht dat stonde omtrent tlyc syn bi rechter voorwaerden ende sonder enigher fauten der abdien van S. Niclaus van Vuerne vorseit. In kennissen ende in orconscepen van desen dinghen so hebben wi scepenen van Vorne voorseit desen tsaertre gheseghelt met onsen propren seghelen unthanghende. Dit was ghedaen als men screef ons Heren iaer m° ccc° xvn* up den neghensten dach vander maent van ingaende aprille.