Nous Guis cuens de Flanders et marchis de Namur, faizons savoir a tous, que comme il fuist ensi, que li abbes et li convens de S. Nicolai de Furnes devizent a nostre chier et foiauble mon seigneur Robiert de Wauriu, neuf livres et siet soûls et quatre deniers de monoye de Flandres par an, sour trente et sys mesures de terre, peu plus ou peu mains, gizans en le parroche de Score, et chuincquante sols de celui mesme monoye, par an, sour wyt mesures de terre, gizans en tieroir de Furnes, le quele rente il tenoit de nous en fief, et il les reporta en no main devant nous hommes de fief, pour faire ent nostre volontei. Nous pour le salut de nostre ame et de nos anchiesseurs donnames et avons donnei, le devant dite terre francke et delivre de celle rente devant dite, al abbei et au couvent devant dit, sauve le iustice que nous retenons en celle terre pour nous, pour nos hoirs et nous successeurs contes de Flanders par le tesmoing de ces lettres sailees de nostre saiel, faites et données a Winendale, lan del incarnation nostre Seigneur mil deus cens quatre-vins et un, lendemain de le Pentecote.