Omnibus Christi fidelibus presentibus pariter et futuris presencium noticiam habituris Mattheus abbas et conventus monasterii Sancti Martini Sacri Montis Pannonie salutem in omnium salvatore. Cum precipitis temporis nimia brevitas, memorie quoque dampnosa oblivio non paciuntur ea, que nostris temporibus aguntur, mente vel animo in longa tempora tenaciter retinere, humana providencia consuevit humamorum actuum seriem nostro evo inter homines celebratam litterarum testimonio solidare solidatamque apicibus memorie sagaciter commendare, ne successu temporum mortalium dira cupiditas, temeraria loquacitate calumniandi materiam valeat invenire et simplicium hominum iura coram quibuscunque futuris iudicibus subvertere vel quovis modo violare, proinde ad universorum tam presentium, quam futurorum noticiam harum serie volumus pervenire, quod reverendus in Christo pater dominus Iacobus, abbas monasterii Sancti Mauricii de BakomBeel, suo personaliter ac tocius conventus sui monasterii predicti nominibus coram nobis constitutus sponte et libere ac animo bene deliberato est confessus in hunc modum, quod, quia nobilis Simon Byby de Kayar grata et fidelia servicia eidem domino Iacobo abbati et per consequens annotato monasterio de Beel cum omni sollicitudine et diligencia ac omni devocionis constancia usque modo semper exhibuit et impendit, multa denique verbera et wlnera pro defensione iurium dicti monasterii de Beel duabus vicibus sustinuit et tolleravit, insuper etiam quandam vineam suam aviticam in promontorio prescripte possessionis Kayar plantatam, cuius quidem vinee confines tales esse perhibentur: nam a septentrione Valentini Zegy, occidente alterius Valentini Beda, meridie vero quedam deserta vinee contigue dicuntur vicinari, centum quoque florenos Hungaricales, quibus id ipsum monasterium de Beel ipsi Simoni Byby obligabatur ex sua mera liberalitate prenotato monasterio de Beel dedisset, donasset, [...] contulisset, ideo memoratus dominus Iacobus abbas ex voluntate et consensu nostro volens ipsi Simoni vicem gratitudinis rependere, eidem hanc libertatem annuit et concessit, ut ipse Simon ac honeste domine Ursula et Barbara, filie eiusdem earundemque heredes et posteritates universi a modo, in antea, vasalli sew nobiles dicti monasterii Sancti Mauritii habeantur, sint et existant, quodque sessionem suam modernam in prescripta possessione Kayar existentem, cui quidem sessioni ab uno latere Ioannis Adoryan, ab altero vero latere Dominici Demy sessiones asseruntur pronunc vicinari, annotatus Simon, suique posteritates et superstites universi simul cum quarumlibet utilitatum et pertinenciarum integritatibus, quovis nominis vocabulo vocitatis ad dictam sessionem de iure et ab antiquo spectantibus et pertinere debentibus, signanter autem quodam fenili trans locum Chelle Molna nuncupatum existenti, quod alias Ioannis Theremes prefuisset, pariter cum quibusdam liberis terris arabilibus ad idem fenile semper et ab antiquo pertinentibus quiete et pacifice absque omni solucione taxarum qualiumcunque teneant et possideant, quodque de quadam vinea, Pokizewlew appellata, ullo unquam tempore nec decimas, neque nonas dicto monasterio dare et solvere debeant et teneantur; immo annuisset et concessisset [...]os nobiles seu prediales sepefati monasterii de Beel, ut prefertur, creasset et prefecisset. In cuius rei testimonium firmitatemque perpetuam presentes litteras nostras privilegiales pendentis et autentici sigilli nostri munimine roboratas dicto nobili Simoni, suisque superstitibus universis duximus concedendas. Datum in festo Beate Catherine virginis et martiris, anno Domini millesimo quingentesimo vigesimo primo.