In nomine Sancte Trinitatis et Individue Unitatis. Andreas Dei gratia Hungarie, Crohatie, Dalmatie, Rame, Servie, Galicie Lodomerieque rex in perpetuum. Privilegia regum felicis memorie tanto efficacius in iure suo intemerata conservari necnon et regia auctoritate nenovari (!), ne ingrata vetustate temporum vel calumpniosa cavillatione depereant, digne promerentur, quanto misericordius ab eis erogata Deo indeffesse servientibus ex ipso rerum argumento evidenter esse edocentur. Dilecti igitur ac fidelis nostri Orez abbatis de monte Sancti Martini in Pannonia favorabili petitioni benigne condescendentes privilegium Beati Stephani regis gloriose memorie tanto clementiori affectu, ne inimice vetustatis succumberet silentio vel aliqua calumpnia emergente deperiret, auctoritate dignum duximus corroborare et renovare, quanto superne vite ferventiori desiderio ab ipso beato rege collatum et confirmatum dicte ecclesie esse minime diffidimus et quanto evidentius, sicut ipse sanctus rex in privilegio suo asserit, quod meritis Beati Martini et orationibus ibidem Deo iugiter servientium quodam tempore de inimicis suis adiutum efficaciter se fuisse senserit, in opportunitatibus nostris nos adiuvari feliciter cottidie sentimus. Unde, quia Beatus rex Stephanus illam ecclesiam speciali prerogativa dilectionis in omnibus amplexus est, tante prerogative, quam ex longa antiquitate possidet, derogare minime in aliquo volentes, sed ut ius exigit, eundem locum, quem integro affectu specialiter diligimus, ampliare satagentes, sibi quicquid est in auctentico beati regis ad recidendum quamlibet calumpniam in posterum perpetuo confirmamus. Tenor autem auctentici ipsius talis est:||
[I. Chr.] In nomine Domini Dei summi. Stephanus superna providente clementia Ungarorum rex ... tributa autem, que a sancto rege Stephano ecclesie Sancti Martini sunt donata, hec sunt: tertia pars de Posan.||
Ut autem hec omnia, que in auctentico beati regis continentur expressa, illibata perpetuo perpetuo (!) et convulsa predecte (!) ecclesie sigilli nostri karactere presentem paginam iussimus insigniri. Datum per manus Thome prepositi Albensis et Ungarie cancellarii anno ab incarnatione Domini Mo ducentesimo XIIIo [1213] venerabili Iohanne Strigoniensi archiepiscopo, reverendo Bertoldo Colocensi archiepiscopo, Bachiensi et Bugdriensi (!) comite existentibus, Calano Quinqueecclesiensem, Kathapano Agriensem, Symone Varadiensem, Desiderio Cenadiensem, Willelmo Ultrasilvanam, Gothardo Zagrabiensem, Iacobo Waciensem ecclesias feliciter gubernantibus, Jula bano et comite de Castroferreo, Nicolao palatino et comite Scenadiensi et alio Nicolao woiada existentibus, Bancone Posoniensem, Andrea Suproniensem Tyburtio Mussoniensem, Poth Kewensem comitatus tenentibus, anno regni nostri nono.