Capitulum ecclesie Hantensis universis, tam presentibus, quam futuris, presens scriptum inspecturis salutem in omnium salvatore. Ad universorum notitiam pervenire volumus presentium per tenorem, quod relicta comitis Hab in nostri personaliter presentia constituta confessa est viva voce, quod, cum terram suam Paznan, quam pro dote sua ab Andrea de Vigman, Nicolao filio suo et Mykone tilio Myke abuerat, Rose, dilecte filie sue pro multiplicibus pietatibus et dilectionibus filialiter sibi exhibitis cum quatuor vineis ibidem in Paznan Sukuro constitutis, servis, libertinis, ancillis ac aliis utilitatibus contulisset, prout in litteris capituli Iauriensis plenius continetur et postmodum ipsa domina Rosa laborans in extremis, in presentia fratrum Sancti Martini de Sacro Monte Pannonie, qui per eandem vocati advenerant, secundum quod in litteris seriatim conventus eiusdem cognovimus, iterum ad manus domine matris sue possessionem supradictam cum eisdem utilitatibus, quibus sibi collata fuerat, reliquisset possidendam, eandem terram cum quatuor vineis antedictis ecclesie Beati Martini sine aliqua contradictione pleno iure pacifice contulit possidendam ita, quod domina usque ad vitam suam fructus ipsius terre et vinearum libere et secure, nemine prepediente percipiendi habebit facultatem. Ne igitur prefate dispositionis confirmatio coram nobis ordinata per quemquam ullo unquam tempore infringatur, presentes ad petitionem iam dicte domine concessimus litteras sigilli nostri munimine roboratas. Datum anno Domini MCCLIII. [1253.] Iacincto preposito, Ipolito cantore, Farcasio lectore existentibus.