Bela, Dei gratia Hungarie, D[almatie, Croatie, Rame, Servie, Gallicie, Lodomerie, Comanieque rex, omnibus tam presentibus, quam futuris litteras presentes] inspecturis salutem in omnium [salvatore. Ad universorum notitiam tenore presentium volumus pervenire, quod fide]lis noster Favus, venerabilis a[bbas monasterii Sancti Martini de Sacro Monte Pannonie ad nostram accedendo presentiam nobis significavit], quod filia Petri, filii comitis Leustachii r[elicta Cozmach filii Gug, cum careret solatio liberorum, terras suas Tamasi et Peturd nuncupatas mo]nasterio Beati Martini in elemosynam perpetuam coram Albensi [capitulo contulerit pacifice possidendas. Cum autem donationes possessio]num facte sine consensu regio non possint perenniter stab[iliri, ideo a nobis instantissime postulavit, quatenus iam dicte domine factas donationes] nostro dignaremur privilegio confirmare. Verum quia idem monasterium speciali gau[det privilegio et cum nos aliunde pro in]cremento utilitatis eiusdem in his et aliis esse favorabiles debeamus, petitionem dicti abbatis iust[am esse omnino att]endentes, premissarum possessionum colla[tionem grat]am habentes, ipsam secundum formam litterarum Albensis capituli, in quorum presentia earumdem donatio facta fuerat, ipso monasterio nostro, auctoritate presentium, duximus confirmandam. Quarum quidem litterarum Albensis capituli tenor tali est:||
(C)apitulum Albensis ecclesie omnibus presentes litteras inspecturis salutem in Domino sempiternam. Ad universorum notitiam harum serie volumus pervenire, quod constitutis coram nobis domina Pykud, filia Petri, filii comitis Leustachii de genere Zak, relicta Cozmach, filii Gwg ab una parte, fratre Bonifacio monaco (!) monasterii Sancti Martini de Sacro Monte Pannonie nomine et vice abbatis et monasterii supradicti ex altera, eadem Pykud terras suas, quarum unam Thamasi vocatam a suo patre karissimo predicto Petro in matrimoniali copula secum traditam et aliam Peturd nuncupatam a suo socero Petro, ecclesie nostre quondam preposito, fratre mariti sui dicti Cozmach sibi collatam, ut dicebat, easdem metis undique distinctas pro optinendo eterne salutis bravio et ob remedium animarum karissimi patris sui Petri antedicti et Cozmach mariti sui et eiusdem prepositi ac filii ipsius domine, nomine Symonis, super eadem terra Peturd interfecti, prenotato monasterio in eodem pleno iure, sicut ipsa domina possedit, contulit et donavit perpetuo possidendas, consentiente karissima filia sua dicta Albina, uxore Petrus et permittente et ipsam donationem per perdilectam suam matrem factam personaliter pio desiderio coram nobis ad perfectum approbante; hoc interposito, quod, si voluntati ipsius domine Pykud placuerit apud ipsum monasterium conversari, ex tunc sepedictum monasterium ad tempus vite sue dando victum et vestitum sibi, utpote matrone piarum largitione elemosynarum ipsum amplexanti, tenebitur providere. In cuius rei memoriam presentes concessimus litteras nostro sigillo communitas anno Domini M° CC° LX° secundo, quarto Nonas Iunii [1262. jún. 2.], magistro Paulo ecclesie nostre electo, aule regie vicecancellario, Gregorio cantore, Feliciano custode, Michaele decano existentibus.||
Ut igitur prefatas possessiones dictum monasterium nostrum possit perpetuo et pacifice possidere, in confirmationem donationis premisse presentes litteras in testimonium dari fecimus sigilli nostri dupplicis munimine roboratas. Datum per manus magistri Farkasii, electi Albensis ecclesie, aule nostre vicecancellarii, dilecti et fidelis nostri, anno Domini M° CC° LX° secundo, regni autem nostri anno vicesimo octavo. [1262.]