Bela, Dei gratia Hungarie, Dalmatie, Croatie, Rame, Servie, Gallicie, Lodomerie, Comanieque rex, universis presentes litteras inspecturis salutem in omnium salvatore. Ad universorum notitiam tenore presentium volumus pervenire, quod, cum ad terram monasterii Sancti Martini de Sacro Monte Pannonie Fyzedtu vocatam hospites libere conditionis fecissemus pro nostro seu regni nostri comodo congregari, de consensu et beneplacito abbatis monasterii supradicti eisdem hospitibus congregatis et congregandis talem ordinavimus seu statuimus libertatem, ut iidem in festo Sancti Martini ratione terragii monasterio Sancti Martini solvent duo pondera annuatim, in aliis autem observabunt libertatem Budensis civitatis tam in facto villici, quam etiam circa iudicia eo modo, ut omnes causas inter ipsos exortas villicus eorum pro tempore constitutus iudicabit, hoc expresso, quod in causa sanguinis due partes iudiciorum cedent monasterio Sancti Martini, tertia parte villico remanente. Item quatuor molendina et tributum in Fyzedtu que ab antiquo fuerunt eiusdem monasterii, eidem monasterio possidenda reliquimus pleno iure. Item illa duo molendina, que abbas dicti monasterii Henc, tunc temporis villico, ob merita servitiorum contulit, idem Henc et sui heredes iure perpetuo possidebunt ita, quod nec villicus, qui pro tempore fuerit constitutus, in ipsis molendinis aliquam ratione villicationis sue habere poterit portionem. Item si aliquis ex illis hospitibus heredum solatio destitutus nature debitum persolverit, de omnibus bonis suis, cuicunque voluerit, legandi, relinquendi seu disponendi liberam habeat facultatem iuxta sue beneplacita voluntatis. Item si quis ex dictis hospitibus contra villicum suum litem agredi voluerit, eundem non nisi ad presentiam abbatis Sancti Martini debeat convenire, quem abbas una cum sex iuratis eiusdem ville iudicabit. Item statuimus, quod nullus barronum (!) nostrorum vel alter aliquis super eosdem hospites descensum possit facere violentum. Preterea piscaturam, quam monasterium Sancti Martini ibidem habuit et possedit, de beneplacito abbatis eiusdem monasterii dictis hospitibus perpetuo duximus conferendam. Item de tributo portus Danubii, quem nos ibidem duximus statuendum, due partes cedent hospitibus supradictis pro deliciis seu servitiis nobis impendendis, tertiam vero partem monasterium percipiet antedictum; de omni autem tributo dicti portus decimam partem terrestres eiusdem terre percipient, per quorum terram transitum faciunt transeuntes. Ut autem concesse libertatis series inviolabiliter observetur, nec per quempiam possit in irritum revocari, presentes dictis hospitibus concessimus litteras dupplicis sigilli nostri munimine roboratas. Datum per manus magistri Farcasii electi Albensis, aule nostre vicecancellarii, dilecti et fidelis nostri, anno Domini millesimo ducentesimo sexagesimo tertio, regni autem nostri vicesimo nono. [1263.]