Bela, Dei gratia Hungarie, Dalmatie, Crovatie, Rame, Servie, Gallicie, Lodomerie, Cumanieque rex, omnibus Christi fidelibus presentium inspectoribus salutem in salutis largitore. Ad universorum noticiam harum serie volumus pervenire, quod accedens ad nostram presentiam Bonifacius abbas Sancti Martini de Sacro Monte Pannonie, exhibuit nobis duo privilegia capituli Geuriensis, unum super facto terre Urunkang, aliud super factis terrarum Renka et Asuan vocatarum confecta, petens a nobis humiliter, ut eadem privilegia nostro dignaremur privilegio confirmare. Quorum siquidem privilegiorum tenor talis est:||
Capitulum ecclesie Geuriensis omnibus Christi fidelibus presentium inspectoribus salutem in salutis largitore. Ad universorum notitiam tenore presentium volumus pervenire, quod Alexander et Belud filii Alexandri de genere Opour una cum matre eorum coram nobis existentes sunt confessi, quod medietatem terre ville Urukang, que ab aliis cognatis sui generis metis separata ad ipsos solum modo, sicut dixerunt, pertinebat, cum omnibus suis utilitatibus, scilicet cum silva et insula cum piscatura et captura piscium, que in nostro vulgari tana et zatun dicuntur, vendidissent venerabili patri Salomoni abbati et conventui Sancti Martini de Sacro Monte Pannonie pro nonaginta et quinque marcis puri argenti plenarie ab eisdem receptis pleno iure perpetuo possidendam. Obligarunt etiam se iidem Alexander et Belud ac mater ipsorum, quod a quibuslibet super illa terra ipsum abbatem et conventum infestare volentibus ipsi et sui heredes, heredumque successores ipsos expedire tenerentur. Exposuerunt etiam iidem Alexander et Belud ac mater ipsorum, quod licet a decem annis iam transactis predicto monasterio et conventui Sancti Martini illam terram nullo contradicente vendidissent, tamen anno Domini M° CC° LIIII° venditionem illius terre ipsi nostras litteras conferendo eisdem effectui mancipassent. Nos igitur ad petitionem prefatorum Alexandri, Belud et matris eorundem, ut predictus dominus abbas et conventus pacifice et quiete predictam terram possint possidere, eisdem presentes concessimus litteras nostri sigilli munimine roboratas, anno Domini M° CC° LIIII° [1254.], Chepano preposito, Syke cantore, Thoma custode, Mikone decano, Virunthone archidiacono Geuriensi existenibus.||
Universitas capituli Geuriensis omnibus Christi fidelibus, ad quos littere presentes pervenerint, salutem in vero salutari. Universitati vestre notum facimus per presentia scripta, quod Vrias Dei gratia abbas Sancti Martini et eius conventus, ex altera parte Iohannes filius Antonii comitis in presentia nostra venientes unacum pristaldo regis Andree tertii (!) nomine Benka de generatione Gug talia proposuerunt, quod prefatus abbas Sancti Martini et eius capitulum super discordia, que inter eos et predictum Iohannem orta fuerat pro tertia parte terre de villa Runka, quam idem Iohannes emerat ab Vrbaz comite de Kamarun, in hunc modum transegissent, quod pro memorate terre tertia parte in prato et in arundineto et in eiusdem terre piscationibus et in stagnis existentibus ubique sepe dictus abbas et capitulum dedissent in concambium pratum ecclesie situm in loco, qui vocatur iuxta ydyoma terre Milartw circummetatum suis metis usque in Danubium cum piscatione Danubii ibidem existente infra easdem metas, non obstantibus aliquibus litteris in privilegiis. Pro molendino autem, quod fecerat, et aliis operibus, que fecerat in supradicta terra, date sunt eidem Iohanni ab ecclesia sepius dicta decem et septem marce. Ne autem processu temporis oblivionis impedimentum vel aliqua emergens cavillatio valeat partibus derogare, presentem causam ter tribus cartis adnotavimus interveniente alfabeto et easdem sigillis capituli Geuriensis et Sancti Martini corroborari decrevimus ex partium consensu, una ex ipsis, que remaneret in camera Geuriensi, altera in camera esset Sancti Martini, tertia penes predictum Iohannem. Hoc autem factum est in presentia canonicorum Geuriensium, videlicet magistri Teobaldi et cantoris Bede et custodis Petri et Pethe magistri hospitalis domus et Thome decani et Iohannis et Pauli et magistri Wirunt; ipso predicto abbate ibidem existente cum fratribus suis scilicet Sebastiano abbate primo decano, Heinrico custode, Silvestro subdecano, Vitali sacerdote, Thoma diacono, et iobagionibus suis Thimoteo et Ceb et Vitali et filio suo Vrolou curialibus comitibus existentibus, videlicet anno ab incarnatione Domini millesimo CC-mo X-mo VI. [1216.]||
Nos itaque petitionibus predicti abbatis Sancti Martini regio inclinati cum favore, dicta duo privilegia capituli Geuriensis presentibus inserta auctoritate presentium duximus confirmanda. In cuius rei memoriam presentes eidem concessimus sigilli nostri duplicis munimine roboratas. Datum per manus magistri Farkasii, Albensis ecclesie prepositi, aule nostre vicecancellarii, dilecti et fidelis nostri, anno Domini M° CC° LX° sexto, regni autem nostri anno tricesimo primo. [1266.]