Capitulum Wesprimiensis ecclesie omnibus presentes inspecturis salutem in Domino sempiternam. Ad universorum notitiam, tam presentium, quam etiam futurorum volumus pervenire, quod Andreas centurio de Gamas pro se et pro Peturne comite udvornicorum cum Poncoz et Paulo comparentibus pro se et pro Keuerche, Choom et Moys sociis et cognatis suis, udvornicis de villa Tord ab una parte et comes Nycolaus, officialis venerabilis viri fratris Bonifacii, abbatis Sancti Martini de Sacro Monte Pannonie pro se et pro eodem domino abbate ab altera parte coram nobis constituti personaliter retulerunt, quod, cum prefati udvornici de Tord et comes ac centurio eorundem super quodam fenili, quinquaginta quinque iugeribus terre arabilis in territorio ville Tord existentibus ac octo vineis ibidem situatis contra predictum dominum B(onifacium) abbatem Sancti Martini coram magnifico viro domino Rolando palatino, Danel prestaldo eiusdem de Symigio existente movissent actionem requirentes premissa nomine sui iuris, idemque dominus abbas eosdem udvornicos de Tord super diversis articulis a converso ordine iudiciario convenisset, tandem, cum inter partes usque ad productionem testium processum extitisset et diutius disceptatum, ex permissione iudicis per arbitrium Iohannis filii Chopoz, Iohannis, Vradya et Kend de Tord, Ominus filii Ambrosii et Gune de Keleuez commetaneorum suorum in huiusmodi plenam pacem et concordiam devenerunt, quod prenotata quinquaginta quinque iugera arabilium terrarum et octo vineas, quas magister Sixtus, lector Strigoniensis, tunc a domino rege ad reambulandum iura udvornicorum deputatus, reambulando ipsis udvornicis de Tord fecerat assignari, comes, centurio eorundem, necnon iidem udvornici de Tord predicto monasterio Sancti Martini reliquerunt et remiserunt iure perpetuo et pacifice possidere mixtim inter iura aliorum hominum de Tord, prout monasterium sepedictum dinoscitur antea possedisse. Pro memorato autem fenili in Tord ante grangiam predicti monasterii a parte aquilonis existente et ad quantitatem quatuor sufficiente predictus dominus abbas Sancti Martini fenetum suum in loco Bothmala vulgariter vocato situm, similiter quatuor iugerum quantitatis, prememoratis udvornicis de Tord in concambium et comutationem assignavit et statuit possidendum irrevocabiliter et quiete et sic omnis lis et altercatio, que inter ipsas partes fuerat hactenus ventillata, sedata extitit penitus et sopita, cassatis et explosis litteris et cause aliis omnibus munimentis, sententionaliter statuendo, quod si que ex eisdem litteris fuerint aliqualiter reservate, robore careant firmitatis et, si qua partium presentem compositionem retractaverit, parti eam observanti viginti marcas nomine pene solvere debeat ante litem. In cuius rei testimonium et memoriam presentes litteras ad petitionem et instantiam utriusque partis concessimus sigilli nostri munimine roboratas. Datum per manus magistri Cosme lectoris ecclesie nostre anno dominice incarnationis M°CC° septuagesimo tertio, [1273.] reverendo in Christo patre domino Paulo episcopo nostro, aule regie cancellario, magistro Paulo preposito, Paulo cantore, Rugas custode existentibus.