Ladizlaus, Dei gratia Ungarie, Dalmatie, Croatie, Rame, Servie, Gallicie, Lodomerie, Cumanie, Bulgarieque rex, universis Christi fidelibus presentes litteras inspecturis salutem in salutis largitore. Ad universorum notitiam tam presentium, quam futurorum harum serie volumus pervenire, quod Bonifacius abbas monasterii Sancti Martini de Sacro Monte Pannonie, fidelis noster, ad nostram accedens presentiam exhibuit nobis privilegium domini Stephani, quondam regis Ungarie serenissimi, inclite recordationis, karissimi patris nostri, confectum super libertatibus populorum monasterii memorati iuxta tenorem privilegii Sancti regis Stephani petens cum instantia, ut ipsum ratificare et nostro privilegio confirmare dignaremur. Cuius tenor talis est:||
Stephanus, Dei gratia Hungarie, Dalmatie, Croatie, Rame, Servie, Gallicie, Lodomerie, Cumanie, Bulgarieque rex, omnibus presens scriptum inspecturis salutem in omnium salvatore. Ad universorum comitum notitiam, Posoniensis videlicet, Nytriensis, Iauriensis, Kamaruniensis, Zaladiensis, Wesprimiensis, Tholnensis, Symigiensis seu omnium aliorum iudicum ac viceiudicum harum serie volumus pervenire, quod accedens ad nostram presentiam fidelis noster Bonifacius, abbas monasterii Sancti Martini de Sacro Monte Pannonie, privilegium Sancti regis Stephani confirmatum per privilegium felicis memorie patris nostri nobis presentavit quorum inspecto tenore cognovimus concessum extitisse ut populos dicti monasterii nullus iudicum preter regiam maiestatem et eum, quem abbas illius monasterii eliget, presumat aliquatenus iudicare. Unde, cum privilegia ecclesiarum et maxime istius monasterii, quod dilectione amplectimur speciali, nullatenus infringere, sed potius inviolabiliter intendamus conservare, volumus et precipimus firmiter et districte, quatenus nullus vestrum populos sepe dicti monasterii nec in furto, nec in decimis, nec in facto monete vel in aliquo presumat iudicare, quos a iurisdictione omnium iudicum per privilegium Sancti regis Stephani exemptos iudicio tantummodo nostro in omnibus causis reservamus iudicandos vel eius, quem elegerit abbas dicti monasterii secundum tenorem privilegii antedicti. In cuius rei memoriam et firmitatem presentes dedimus litteras duplicis sigilli nostri munimine roboratas. Datum per manus magistri Benedicti, prepositi Orodiensis, aule nostre vicecancellarii, dilecti et fidelis nostri, anno Domini M° CC° septuagesimo, regni autem nostri anno primo. [1270.]||
Nos igitur petitionibus dicti abbatis ex benignitate regia favorabiliter inclinati predictum privilegium karissimi patris nostri non abrasum, nec in aliqua sui parte viciatum ratum habentes et acceptum, de verbo ad verbum presentibus insertum duplicis sigilli nostri munimine duximus confirmandum. Datum per manus Benedicti (!), Orodiensis ecclesie prepositi, aule nostre vicecancellarii, dilecti et fidelis nostri, anno Domini M° CC° septuagesimo tertio, sextodecimo Kalendas Augusti [1273. júl. 17.], regni autem nostri anno primo, metropolitica Strigoniensis ecclesie sede vacante, venerabilibus patribus Stephano, Colochensi et Iohanne Spalatensi archiepiscopis, Lamperto Agriensi, Iob Quinqueecclesiensi, Bryccio Chanadiensi, Phylippo Wachiensi, aule domine regine, karissime consortis nostre cancellario, comite Neugradiensi, Paulo Wesprimiensi, aule nostre cancellario, Tymotheo Zagrabiensi, Lodomerio Waradiensi, Dyonisio Iauriensi et Petro Transsilvano episcopis ecclesias Dei feliciter gubernantibus, Rolando palatino, iudice Cumanorum, Hernico (!) bano tocius Sclavonie, Nicolao woyoda (!) Transilwano, comite de Zonuk, Ioachimo magistro tavarnicorum nostrorum, comite Posoniensi et de Pylis, Egidio bano de Machou, Renaldo magistro dapiferorum, comite Zulgageuriensi, Wgrino magistro agasonum, comite Syrmiensi, Laurentio magistro pincernarum nostrorum, comite de Kevy et de Crasu, Paulo bano Sceuryno, Moys comite Symigiensi, Dedalo comite Zaladiensi, Gregorio comite Castri Ferrei, Iohanne comite Supruniensi, Mychaele comite Nitriensi et aliis quam pluribus comitatus regni nostri tenentibus et honores.