Universis Christi fidelibus presentes litteras inspecturis miseratione divina Esgerus Lundensis, Swechie primas, Onufrius Salernitanus, Raymundus Ebredunensis, Richardus Surrentinus, Rostagnus Neopatensis archiepiscopi, Franciscus Firmanus, Fernandus Portugalensis, Petrus Narniensis, Egidius Andrinopolensis, Guillelmus Puteolanus, Petrus Cenomanensis, Petrus Civitatis Nove, Franciscus Gaietanus, Nicolaus Argolicensis, Guillelmus ad partes Thartarorum, Orlandus Domotensis, Symon Parmensis, Dominicus Meteliensis, Lutcho Pomeraniensis et Iacobus Nucherinus episcopi salutem in Domino. Pia mater ecclesia de animarum salute sollicita devotionem fidelium per quedam munera spiritualia, remissiones videlicet et indulgentias invitare consuevit ad debita famulatus honorem Deo et sacris edibus impendendum, ut quanto crebrius et devotius illuc confluit populus Christianus assiduis Salvatoris gratiam precibus implorando, tanto celerius delictorum suorum veniam et gaudia consequantur (!) eterna. Cupientes igitur, ut ecclesia monasterii Sancti Martini Sacri Montis Pannonie, Iauriensis diocesis, congruis honoribus frequentetur et a Christi fidelibus iugiter veneretur, omnibus vere penitentibus et confessis, qui ad ipsam ecclesiam in festivitatibus infrascriptis, videlicet Nativitatis Domini nostri Iesu Christi, Circumcisionis, Epyphanie, Parasceves, Resurrectionis, Ascensionis et Penthecostes, in omnibus et singulis festivitatibus Beati Marie virginis, Beatorum Petri et Pauli ac omnium aliorum apostolorum et evangelistarum, Inventionis et Exaltationis Sancte Crucis, Michaelis archangeli, Iohannis Baptiste, Martini, Stephani, Ladizlai, Emerici regum, Stephani prothomartiris, Georgii, Benedicti, Eligii, Ludovici episcopi, item Ludovici regis Francie, Nicolai, Laurentii, Panthaleonis, Katherine, Cecilie, Agnetis, Agathe, Scolastice, Elizabeth, Margarete, Lucie, in Commemoratione Omnium Sanctorum in dedicatione ipsius ecclesie et per octavas dictarum festivitatum causa devotionis, peregrinationis vel orationis accesserint, aut qui ad fabricam luminaria, ornamenta et alia dicte ecclesie quicquam suarum legaverint facultatum, quive nuntios ipsius ecclesie benigne receperint vel eidem ecclesie elemosinas suas transmiserint, quotienscunque premissa vel premissorum aliquid fecerint, de omnipotentis Dei misericordia et Beatorum Petri et Pauli apostolorum eius auctoritate confisi singuli nostrum singulas dierum quadragenas de iniunctis sibi penitentiis misericorditer in Domino relaxamus. Datum Avinione, anno Domini millesimo trecentesimo vicesimo, mense Aprilis, pontificatus sanctissimi patris domini Iohannis, divina providentia pape XXII quarto. [1320. ápr.]||
Nos vero Nicolaus, miseratione divina episcopus Iauriensis, piam et salubrem devotionem ipsius domini abbatis considerantes, de omnipotentis Dei misericordia confisi omnibus vere penitentibus, qui quovis dictorum titulorum eidem monasterio Sancti Martini manus porrexerint adiutrices, de iniunctis sibi penitentiis quadraginta dies misericorditer in filio virginis gloriose relaxamus.||
[A plicatura tetején]: Has indulgentias portavit de curia Romana venerabilis pater Nicolaus, Dei et apostolice sedis gratia abbas dicti loci, quondam abbas de Dombo, ob remedium anime sue et augmentationem devotionis fidelium. Orate pro eo.