Capitulum Iauriensis ecclesie omnibus Christi fidelibus, presentibus pariter et futuris, presentes litteras inspecturis salutem in eo, qui est omnium vera salus. Ad universorum notitiam harum serie volumus pervenire, quod Dominicus filius Iohannis, filii Primus de possessione Bathyan pro se et pro Iwanka fratre suo uterino ab una parte, nobilis vir comes Dethylinus, casiellanus montis Sancti Martini de Sacro Monte Pannonie ex altera ad nostram presentiam accedendo, antedictus Dominicus suo et eiusdem Iwanka fratris sui vice et nomine quandam terram seu possessionem suam Durugh vocatam in comitatu Iauriensi existentem per Lanch, filium Pauli quondam nobilem de Gewd, prefato Iohanni patri suo datam et donatam sub certis metis et terminis distinctam et possessam de consensu et beneplacito vicinorum et commetaneorum prefate terre Durugh, prout referebant, dedit et vendidit et tradidit eidem comiti Dethylino et per eum suis heredibus, heredumque suorum successoribus pro tribus marcis denariorum Wiennensium pro tempore currentium in Iaurino, eidem plene persolutis perpetuo pacifice et irrevocabiliter possidendam, tenendam et habendam obligationi tali interposita et per prenotatum Dominicum assumpta, quod quicunque successivorum temporum mutatione eandem terram Durugh ab ipso comite Dethylino vel suis heredibus repetere attemptaverit vel quovis titulo aggravare, prefati filii Iohannis seu eorum heredes tenebuntur expedire eosdem propriis laboribus et expensis. Que quidem terra circumdatur et vallatur possessionibus personarum inferius nominatarum, videlicet a plaga orientis alia possessio Durugh vocata domine regine separat et distingit, a parte meridionali iobagionum castri Musuniensis, a plaga vero occidentis possessio abbatis Sancti Martini de Sacro Monte Pannonie distingit, ab aquilone autem separat et distingit possessio Peer nuncupata domini episcopi Iauriensis et sic inclusive prefata terra Durugh per ipsum comitem Dethylinum [remanet possidenda]. Ad maioris etiam cautele remedium litteras nostras privilegiales olym super ipsa terra confectas sepedictus Dominicus nostri in presentia in manus ipsius comitis Dethylini assignavit. In cuius rei memoriam et perpetuam firmitatem presentes concessimus litteras, appensione sigilli nostri autentici munimine robor[atas. Datum feria qua]rta proxima post dominicam Cantate, anno Domini millesimo trecentesimo vicesimo nono, [1329. máj. 24.] magistris Mathia lectore, Georgio cantore, Iacobo custode, ceterisque fratribus et dominis ecclesie nostre existentib[us].