(C)apitulum Iauriensis ecclesie, cunctis Christi fidelibus, quibus presens scriptum patuerit, salutem in Domino sempiternam. Ad universitatis notitiam tenore presentium cupimus fieri notum, quod religiosi viri dominus Nicolaus abbas et conventus monasterii de Sacro Monte Pannonie, ad Romanam ecclesiam nullo medio pertinentis, per fratrem Ioannem priorem ipsorum sanctissimi in Christo patris ac domini nostri domini Iohannis pape vicesimi secundi litteras nobis non abolitas, non cancellatas, nec in aliqua sui parte vitiatas exhibuerunt petentes nos humiliter et devote, quatenus litteras easdem nostris litteris inseri et conscribi sub sigillo nostro dignaremur ad cautelam certo certiorem. Quarum litterarum tenor talis est:||
Iohannes episcopus, servus servorum Dei, dilecto filio ... abbati monasterii Beate Marie de Bokan, Vesprimiensis diocesis, salutem et apostolicam benedictionem. Conquesti sunt nobis abbas et conventus monasterii de Sacro Monte Pannonie, ad Romanam ecclesiam nullo medio pertinentis, ordinis Sancti Benedicti, Iauriensis diocesis, quod ... rector ecclesie de Segusd, Vesprimiensis diocesis, super quibusdam decimis et rebus aliis ad dictum monasterium spectantibus iniuriaretur eisdem. Ideoque discretioni tue per apostolica scripta mandamus, quatinus partibus convocatis audias causam et appellatione remota debito fine decidas, faciens, quod decreveris, per censuram ecclesiasticam firmiter observari. Testes autem, qui fuerint nominati, si se gratia, odio vel timore subtraxerint, censura simili appellatione cessante compellas veritati testimonium perhibere. Datum Avinione, Kalendis Iulii, [1330. júl. 1.] pontificatus nostri anno quartodecimo.||
Nos vero precibus iustis acquiescentes et condignis annuentes, memoratas litteras nostris litteris inseruimus et de verbo ad verbum non abolitas, non cancellatas, nec in aliqua sui parte vitiatas conscribi fecimus et cum sigilli nostri capituli autentici munimine communiri. Datum octavo Kalendas Iulii, anno incarnationis Domini M° CCC° XXX° secundo, [1332. jún. 24.] domino Nicolao preposito de Sancto Adalberto, Mathia lectore, Georgio cantore, Petro custode existentibus.