Iohannes episcopus, servus servorum Dei, dilecto filio Guillelmo Hamer, abbati monasterii Sancti Martini de Sacro Monte Pannonie, ad Romanam ecclesiam nullo medio pertinentis, ordinis Sancti Benedicti, Iauriensis diocesis, salutem et apostolicam benedictionem. Apostolice solicitudinis studium circa diversa, que agenda nostris incumbunt humeris, est illud potissimum, ut circa monasteriorum omnium statum salubrem et utilem procurandum et presertim illorum, que pastorum destituta solatio Romane ecclesie nullo medio sunt subiecta, sic solita diligentia intendamus, quod monasteria eadem nostre operationis studio superni favoris auxilio suffragante preserventur a noxiis et prosperitatis votive successibus gratulentur. Nuper siquidem monasterio Sancti Martini de Sacro Monte Pannonie ad eandem Romanam ecclesiam nullo medio pertinentis, ordinis Sancti Benedicti, Iauriensis diocesis, per obitum quondam Nicolai elusdem monasterii abbatis, qui in partibus illis diem clausit supremum, pastoris regimine destituto, dilecti filii conventus eiusdem monasterii vocatis omnibus, qui debuerunt, voluerunt et potuerunt commode interesse, die ad eligendum prefixa, ut moris est, convenientes in unum, te dicti monasterii monachum, ordinem ipsum expresse professum et in sacerdotio constitutum in abbatem eiusdem monasterii concorditer elegerunt, tuque huiusmodi electioni de te celebrate ad instantiam dictorum conventus prestans assensum pro confirmatione electionis huiusmodi obtinenda personaliter ad sedem apostolicam accessisti et exponi fecisti huiusmodi electionis facte negotium coram nobis. Nos igitur electionem ipsam ex certis causis legitimis reputantes, prout erat, irritam et inanem ac ad provisionem ipsius monasterii, ne longe vacationis exponeretur incommodis, paternis et solicitis studiis intendentes et desiderantes quam celeriter ad regimen dicti monasterii preponere personam, per quam monasterium ipsum posset preservari a noxiis et adversis ac in suis manuteneri iuribus et etiam adaugeri post deliberationem, quam super hoc cum fratribus habuimus diligentem, demum considerantes concordem te eligentium voluntatem, ad te, cui de religionis zelo, litterarum scientia, vite munditia, honestate morum, conversatione laudabili et aliis multiplicum virtutum meritis fide digna testimonia perhibentur, convertimus oculos nostre mentis. Quibus omnibus attenta meditatione discussis de persona tua dicto monasterio de ipsorum fratrum consilio auctoritate apostolica providemus, teque illi preficimus in abbatem, curam et administrationem ipsius tibi tam in spiritualibus, quam in temporalibus plenarie committendo, firma concepta fiducia, quod dirigente Domino actus tuos prefatum monasterium per tue industrie ac circumspectionis fructuosum studium, tuumque ministerium studiosum regetur utiliter et prospere dirigetur et grata in ... spiritualibus et temporalibus auctore Domino suscipiet incrementa. Quocirca discretioni tue per apostolica scripta mandamus, quatinus opus regiminis dicti monasterii suscipiens reverenter sic te in eo salubriter exercendi fidelem exhibeas ac studiosum, quod dictum monasterium per laudabile tue diligentie studium gubernatori provido et fructuoso administratori sentiat se commissum, tuque preter retributionis eterne premium nostre ac predicte sedis favoris et gratie exinde merearis percipere incrementum. Datum Avinione, XV. Kalendas Maii, pontificatus nostri anno decimo sexto. [1333. ápr. 14.]