Nos conventus monasterii Sancti Martini de Sacro Monte Pannonie damus pro memoria, quod religiosus vir dominus Iohannes, abbas monasterii Sancti Mauricii de Beel, in nostri personaliter presentia constitutus, per modum protestationis nobis significare curavit, quod, licet ipse diversis negotiis, incommodis et necessitatibus ecclesie sue prepeditus ad presens possessionem eiusdem ecclesie nomine Arpas iuxta fluvium Raba in commetaneitate magistri Mauricii, filii Nicolai, existentem, habitationibus decorandi et tributum pontis ibidem super dictam Raba exigi solitum ad ipsam ecclesiam suam legitime similiter pertinens, iuris ordine de manibus occupantium requirendi facultatem secundum suum desiderium non haberet, quamprimum tamen ex dono altissimi premissa votive faciendi facultas sibi adfuerit oportuna, hec illico facere intenderet, atque vellet; unde huiusmodi protestatione interposita vicinos et commetaneos dicte possessionis Arpas et specialiter antedictum magistrum Mauricium et suos iobagiones ac alios universos ab occupatione, usu et utilitatum ac fructuum perceptione eiusdem possessionis et pertinentiarum suarum quarumlibet ac etiam a dilapidatione et destructione antique ecclesie Sancti Andree in facie ipsius possessionis site, item memoratum magistrum Mauricium et alios quoslibet, quibus idem vel sui predecessores aut etiam posteri prefatum tributum hactenus forsan dedissent, seu dare et tradere niterentur, ab ampliore eiusdem detentione, traditione, obtentione, quavisque distractione, alienatione sive sibi perpetuatione factis quovis modo vel faciendis in propria et sui conventus, monasteriique predicti nominibus et personis prohibuit contradicendo publice coram nobis, Datum in festo Beati Bartholomei apostoli, anno Domini M°CCC°XXX° quinto. [1335. aug. 24.]