Nos Wyllermus Drugett, palatinus et iudex Comanorum, tenore presentium significamus, quibus expedit universis, quod, cum nos ob devotionem specialem, quam erga merita felicissima Beati Martini confessoris gerimus et habemus, ad visitandum monasterium eiusdem in Sacro Monte Pannonie constitutum cum sincera devotione accessissemus, vir religiosus Wyllermus abbas et fratres conventuales eiusdem monasterii ad nostram accedentes presentiam exhibuerunt nobis diversa paria privilegiorum et instrumentorum Sanctissimi regis Stephani fundatoris eiusdem loci et aliorum regum sibi succedentium formam et modum libertatum eiusdem ecclesie, abbatis, populorum predialium et conditionalium ad eandem pertinentium lucidissime contentorum, in quibus inter varios articulos libertatum ipsius ecclesie, abbatis et populorum eiusdem conperimus contineri, quod tam abbas dicte ecclesie constitutus pro tempore, quam etiam servitores, iobagiones et populi cuiusvis status et conditionis existant ad eandem ecclesiam Sancti Martini spectantes et pertinentes ubique in regno Hungarie existentes, a iudicio, iurisdictione, potestate et iudicatu quorumlibet iudicum, iustitiariorum et comitum regni Hungarie exempti omnino sint et habeantur preter regiam personam, nec alicuius iudicio astricti fore censerentur quoquomodo. Unde nos visis et perlectis eisdem privilegiis et instrumentis de libertatibus sepedicte ecclesie realiter informati tam ipsam ecclesiam, quam abbatem et universos populos spectantes ad eandem in eisdem libertatibus et libertatum prerogativis, gratiis conmisimus inmobiles, prout continentia exprimit instrumentorum prenotatorum. Datum in dicto monte Sancti Martini confessoris, in crastino festi Beate Marie Magdalene, anno Domini millesimo CCC° XXX° quinto. [1335. júl. 23.]