Nos frater Wilhelmus, divina miseratione abbas monasterii Sancti Martini de Sacro Monte Pannonie, omnibus Christi fidelibus, presentes litteras inspecturis salutem in omnium salvatore. Quoniam unicum est oblivionis remedium descriptio litteratum, que calumpniis infert silentium et modum contentionis explicans sua serie presentibus et futuris loquitur veritatem, ad universorum igitur notitiam volumus pervenire, quod universitas yobagionum nostrorum de Bugath, de Kara, Tephey, de Zamarkuth, de Tord et de Raad ac pertinentium ad easdem, ad nostram accedentes presentiam exponendo nobis sua gravamina, que per inordinatas et indebitas exactiones et census extraordinarios incurrissent, humiliter supplicando, ut talibus in oportunitatibus remedium oportunum inponere dignaremur. Quorum petitiones et humiles supplicationes dignas fore censuimus, matura deliberatione eorum gravamina cupientes alleviare et taliter duximus disponendum, ut per huiusmodi census indebitos et extraordinarios de cetero nullatenus graventur, sed iusto et ordinato censu nobis, ut in subsequentibus describitur, singulis nobis annis in hunc modum teneantur, ut videlicet singula lanya integra in predictis villis existentia singulas duas pensas banalium in duobus terminis, videlicet in festo Beati Georgii unam pensam et in festo Beati Martini aliam pensam pro censu annuali nobis dare et solvere tenebuntur, regalibus censibus et exactionibus dumtaxat exceptis, que in regno communiter fieri consueverunt; hiis etiam declaratis, quod tria exenia in tribus festis consuetis per singulos annos singuli nobis iuxta antiquam eorum consuetudinem dabunt, item pro victualibus nostris, quando conveniens et oportunum nobis videbitur, viginti lania duas pensas banalium aut unum pecus pascuale, duos cubulos avene, duos panes et unum pullum bonum dabunt, item, si quempiam ipsorum sine herede decedere contingat, mediam marcam monete pro tempore currentis aut pecus trienne pro iure consueto dabit; iugera nostris aratris propriis arare, feneta nostra recolligere et vina nostra deducere tempore oportuno secundum antiquam eorum consuetudinem tenebuntur; et si quis aut qui recedendi haberent intentionem, infra quindenas termini solutionis, ut premissum est, licentia habita, iustoque terragio persoluto, libere recedat vel recedant; si vero intra quindenas terminorum predictorum, ut est pretactum, vellent recedere, censum sibi prefixum iuxta singula premissorum nobis solvere tenebuntur; item si qui in predictis possessionibus nostris cellaria, domos aut aliqua edificia fecerint, iuxta estimationem suorum cohospitum liberam habeant vendendi facultatem; si vero ad prompta et parata edificia venerint unius anni, ad vacua vero loca venientes trium annorum libertate pacifice perfruantur, de hiis omnibus assecurati nostra fide. Ut igitur hec omnia robur perpetue firmatatis obtineant, presentes litteras concessimus eisdem sigilli nostri appensione conmunitas. Datum per manus fratris Iohannis, notarii nostri, anno Domini millesimo XXX° sexto. [1336.]