Nos frater Nicolaus, miseratione divina abbas monasterii Beati Mauricii de Beel, discretis viris et honestis, amicis suis karissimis, universis scilicet dominis plebanis, sacerdotibus, ecclesiarum rectoribus in diocesiis Iauriensi et Vesprimiensi existentibus, ad quos presens scriptum devenerit, vel quibus ostenditur, orationum suffragia devotarum in filio Virginis gloriose. Vos, qui vices septuaginta duorum disscipulorum (!) geritis et in ecclesiis vestris in kathedra Beati Petri apostoli residetis et sedetis ac inter plebesanos et populos vestros sermone et exemplo, necnon monitione vice duodecim apostolorum estis constituti, plebesanos et suffraganeos vestros monere et consulere debetis in omnibus operibus bonis et exemplis, maxime in elemosinarum largitione esse efficaces, quia elemosinarum largitio permanet in eternum; ut dicitur, sicut aqua extingit (!) ignem ita elemosina extingit peccatum; alias vero apostolus ait: quoniam omnes stabimus ante tribunal Christi, reddituri sumus rationem, unusquisque prout gessit sive bonum sive malum. Proinde ad sanctarum devotionum vestrarum notitiam harum serie volumus pervenire, quod accedens ad nostram presentiam quidam pauper, nomine Iohannes, cupiens heremitorium sub potestate ordinis nostri et nostra protectione constitutum scilicet, capellam Sancte Crucis in Bocon, secus viam, que ducit ad monasterium Beati Mauricii constructam, petens nos instantissime, ut ipsam capellam prenotatam fratri Iohanni memorato sibi dare dignaremur causa commorandi. Nos igitur premeditantes de desolatione capelle nostre sine hominibus heremitis et heremitarum habitationibus caruisse, ipsam capellam Sancte Crucis eidem fratri Iohanni dedimus et contulimus, devastationes ipsius meliorare et reformationes (!) causa procurandi, ut ipse inibi curiam et domos pro se et aliis viatoribus et aliis nomen Domini invocantibus ac alia edificia debeat procurare. Unde universitatem vestram diligenter petimus per presentes, quatenus ipse frater Iohannes lator presentium heremita capelle Sancti Crucis tociens quociens ad vos et vestram parrochiam accesserit causa mendicandi, nullatenus ipsum inhibeatis, sed magis eidem subvenitas ob reverentiam Christi et Sancte Marie et memoriam Sancte Crucis ac nostre petitionis intuitu; secus non faciatis, sed potius ipsum de domibus vestris et parochiis sine aliqua turbatione et molestia abire permittatis. Datum in festo apostolorum Petri et Pauli, anno Domini Mo CCCo XXXo VIIIo. [1338. jún. 29.]