(Nos) Wyllermus Drugeth, palatinus et iudex Comanorum, tenore presentium significamus, quibus expedit, universis memorie commendantes, quod, cum anno dominice incarnationis M° CCC° XXX° quinto venerabilis in Christo pater et dominus Gyllermus, divina miseratione abbas ecclesie Beati Martini de Sacro Monte Pannonie, magistrum Stephanum, filium Ioachymi Marzaly, de comitatu Symigyensi pro ad sabbatum proximum post festum Beati Andree apostoli, [1335. dec. 2.] secundo ad octavas Beati Georgii martiris anno sequenti, [1336. máj. 1.] tertio ad octavas similiter Beati Georgii martiris anno Domini M° CCC° XXX° septimo, [1337. máj. 1.] quarto ad octavas Beati Iacobi apostoli anno sub eodem, [1337. aug. 1.] quinto ad quindenas diei Cynerum anno Domini M° CCC° XXX° octavo [1338. márc. 11.] iuxta continentiam litterarum conventus monasterii Symigyensis citatoriarum ad nostri presentiam in causam ratione quarundam decimarum in possessionibus seu villis Marzaly, Geyznou et Gadan vocatis in dicto comitatu Symigyensi existentibus attraxisset et ipsa causa de termino ad terminum diversis prorogationum cautelis hinc ob regium preceptum in gravaminibus iudiciariis influentibus atque ad reformationem pacis ultimo ad quindenas festi Beati Georgii martiris [1338. máj. 8.] consequenter protellata extitisset, prout ad hec nos continentia causalium et ipsarum citatoriarum lucide informabat litterarum, ipsis quindenis occurrentibus Thomas litteratus cum legitimis eiusdem Gyllermi abbatis procuratoriis litteris iuxta nostrarum continentiam litterarum pro eodem domino abbate ad nostram accedens presentiam, in figura nostri iudicii, ubi equo tramite iuris regni nobilium causas et statera equitatis discutiebamus iudicantes, proposuit eo modo, quod magister Stephanus, filius Ioachym, memoratas decimas villarum Marzaly, Geyznou et Gadan predictarum a quatuor annis citra transactis pro se occupasset ad ecclesiam predictam pertinentes, nec ipsi domino abbati et suis officialibus vel decimarum exactoribus dicare facere vel exigere permisisset, per quod factum dampni centum marcarum eidem domino abbati intulisset et in instanti exhibuit duo paria litterarum capituli ecclesie Iauriensis inquisitionalium et tria paria litterarum conventus Symigyensis et Pechwaradyensis ac capituli Quinqueecclesiensis uniformiter ipsas decimas ad memoratam ecclesiam pertinere approbantes.||
Quo peracto Petrus litteratus, serviens dicti magistri Stephani, cum procuratoriis litteris comitis Pauli, iudicis curie domini nostri regis, plenum et speciale mandatum in exsecutione premissa continentibus ex adverso respondendo dominum suum predictum non occupasse, nec prohibuisse decimas ac etiam centum marcarum dampni intulisse penitus denegavit, allegans in actione domini abbatis innocem (!) penitus et imunem, etiam ad decimas in villis predictis ipsum dominum suum nihil contingere negotii vel pertinere affirmavit.||
Verum, quia idem procurator domini abbatis ius ecclesiasticum, scilicet ipsas decimas velle rehabere dominum suum ordine iudiciario ab eodem Stephano contendebat, quamquam dicte inquisitionales littere, quedam articulo prohibitionis, quedam ratione occupationis emanate, variebantur et tamen Petrus, eiusdem Stephani procurator, nichil ad dominum suum iuris in ipsis decimis equiformiter pertinere asserebat, nos una cum regni nobilibus nobiscum in iudicio assidentibus iudicantes decrevimus, quod idem dominus abbas decimas modo premisso retentas in ipsis villis transactorum quatuor annorum et a modo, prout ad ipsam pertinere dignoscuntur ecclesiam, perpetuo iure percipiendi plenam habeat, contradictione eiusdem Stephani non obstante et sine preiudicio iuris alieni, facultatem. Datum in Wysegrad, duodecimo die termini prenotati, anno Domini M° CCC° XXX° octavo. [1338. máj. 19.]