Nos Nicolaus abbas monasterii Beate Virginis de Demenk et conventus loci eiusdem significamus, quibus expedit, universis presentium per tenorem, quod nobilis domina, Sebe nomine, relicta Mathei, filii Dietrici de Chigla coram nobis personaliter constituta confessa est viva voce, quod in possessione sua predicta, Chigla vocata, que quidem possessio a predicto Matheo, domino suo remansit et per factum iudicis necessitate conpulsa, ut ne in manus iudicis deveniret, XII iugera terrarum arabilium Pethe Magno, Andree et Paulo, filiis Buda de eadem Chigla pro septima (!) dimidia pensa denariorum plenarie receptorum ab eisdem pignori obligasset a data presentium usque sextam revolutionem eiusdem annualem per eosdem possidenda. Qui (!) si ipsis sex annis completis redimere poterit, bene quidem, alioquin deinceps ad numerum trium annorum possidebunt et post hoc, quicunque petierit, liberam habebit redimendi facultatem. Cui quidem inpignorationi Laurentius, filius Oliveri de eadem Chigla, utrisque partibus assensum prebuit et consensum pure et per omnia liberalem; hoc expresso, quod nemo aliorum, nec predicta domina Sebe aut Margareta filia eius, nec Laurentius, filius Oliveri prenotatus redimere possint ab eisdem et si medio tempore causa divisionis per generationem nobilium ibidem existentium a predicta domina eandem terram alienari contingat, extunc terram equevalentem (!) pietatis filiis Buda dare tenebitur e converso. Datum in crastino festi Ascensionis Domini anno eiusdem Mo CCCo XLmo.