Nos Karolus, Dei gratia rex Hungarie, damus pro memoria, quod vir religiosus frater Wyllermus, abbas monasterii Sancti Martini de Sacro Monte Pannonie, ad nostram specialem accedendo presentiam per modum protestationis nobis significare curavit, quod tributum de Fyzeegthu, quod temporibus impaccatis (!) per homines potentes ad villam Nezmel est translatum et nunc in eadem Nezmel exigitur, super quo etiam, ut dicitur, litis materia inter venerabilem in Christo patrem dominum fratrem Witum, gratiam per eandem episcopum Nitriensem, ut actorem ab una et magistrum Nicolaum, informatorem domini Lodovici ducis, filii nostri karissimi, ut in causam attractum parte ab altera vertitur, esset ecclesie sue Sancti Martini prenotate et ad ipsam ecclesiam Sancti Martini pertineret et de iure deberet pertinere. Unde faciendo huiusmodi protestationem ipsum dominum episcopum Nitriensem ab acquisitione et reoptentione dicti tributi et magistrum Nicolaum prenotatum a detentione et amissione eiusdem nomine iuris ecclesie sue Sancti Martini prenotate prohibuit contradicendo et contradixit prohibendo in ipsa presentia speciali nostre maiestatis. In cuius prohibitionis et protestationis testimonium presentes eidem domino abbati ad suam instantem petitionem duximus concedendum (!) communi iustitia suadente. Datum in Damas in festo Sancte Trinitatis, anno Domini M° CCC° XL°. [1342. máj. 26.]