Omnibus Christi fidelibus presentibus et futuris, presens scriptum inspecturis Syfridus, Dei et apostolice sedis gratia abbas monasterii Sancti Martini de Sacro Monte Panonie et conventus eiusdem loci salutem in Domino sempiternam. Ad universorum notitiam harum serie volumus pervenire, quod nos tertias partes tributorum nobis et monasterio nostro ab antiquo provenientes super magnam aquam Danubii in Posonio et in Challo in villa videlicet Verkenye exigi consuetas matura inter nos deliberatione prehabita nobili viri comiti Iakus, filio Nicolai, iudici Posoniensis civitatis, a data presentium ad decem annos proxime nunc consequenter venturos, finitisque ipsis decem annis per eundem nobis et nostro monasterio pacifice et libere occasione et contradictione qualibet postposita remittendas pro rebus et sub penis inferius declarandis locavimus et assignavimus percipere eo modo et iure, quibus nos, nostrique predecessores possedimus et possederunt vel perceperunt easdem ita videlicet, quod dictus comes Iakus in quolibet anno prefatorum decem annorum ducentos et quadraginta florenos auri veri ponderis et caloris in duobus terminis infrascriptis, videlicet centum et viginti florenos in quolibet festo Beati Georgii martiris, residuos centum et viginti florenos in quolibet festo Sancti Michaelis archangeli post se se consequenter venturis sine crastinatione in dicto nostro monasterio dare nobis et solvere teneatur, litteras nostri conventus expeditorias super qualibet solutione facienda, quas eidem dare tenebimur, recepturus, talibus conditionibus interpositis, quod, si prefatus comes Iakus primum terminum solutionis in quocunque premissormn decem annorum preteriret insolutum, in duplo remaneret, si vero primum terminum expediret et secundum solvere negligeret, ex tunc prius persoluta pecunia inconputabilis haberetur et secunda solutio, ut premissum est, obmissa gravamine centum marcarum argenti persolveretur; hoc insuper adiecto, quod, si predictas tributarias portiones cum suis utilitatibus post dictorum decem annorum decursum sepedictus Iakus nobis et nostro monasterio libere, qualibet ratione frivola inventa remittere nollet aut ulterius detineret occupatas vel detineri et occupari faceret, ex tunc in quingentis marcis argenti absque iudicis portione coram quovis iudice remaneret contra nos et nostrum monasterium prenotatum eo facto, eandem quoque penam et gravamen filii et heredes ipsius Iakus incurrant, si ipso Iakus infra dicte locationis tempus, vocante Deo, quod absit, ab hac luce migrante de supradictis nostris partibus tributorum ulterius se intromittere attemptaverint aut quoquo modo inpedire, sed ad nos statim et nostrum monasterium libere revertantur. In cuius locationis premisse tributarie portionis memoriam presentes litteras privilegialiter emanatas apensione sigilli nostri conventus fecimus roborari. Datum in festo Sancti Georgii martiris, anno Domini M° CCC° quinquagesimo sexto. [1356. ápr. 24.]