Omnibus Christi fidelibus, presentibus pariter et futuris, presentem paginam inspecturis Syfridus, Dei et apostolice sedis gratia abbas monasterii Sancti Martini de Sacro Monte Panonie et eiusdem loci conventus salutem in salutis largitore. Ad universorum notitiam harum serie volumus fieri manifestum, quod nos mature deliberando inter nos nobilem virum comitem Iakus, filium Nicolai, iudicem civitatis Posonyensis, officialem ville nostri monasterii Deaky vocate, in comitatibus Posonyensi et Nytriensi existentis a data presentium ad decem annos consequenter nunc venturos facimus et constituimus tali modo, quod idem comes Iakus eandem possessionem Deaky cum onmibus ad se pertinentibus sub certis suis metis et antiquis regere et pro posse suo una cum predio Stara vocato in metis eiusdem possessionis Deaky existenti, populis et habitatoribus decorare, populos, habitatoresque ab aliorum insultibus tueri et in eorum libertatibus et iuribus conservare, item terragium, munera, fructus, pissces, feneta, pecora et alias quaslibet utilitates, quovis nomine vocitatas singulis annis predictorum decem annorum suo tempore ad duas partes equales dividi conscientiose faciendo, factaque huiusmodi divisione rectam dimidietatem omnium premissorum ad nostrum monasterium predictum sine aliqua diminutione et variatione nobis transmittere et deferri facere teneatur, aliam dimidietatem earundem, una cum omnibus birsagiis eidem comiti Iakus remanentibus pro suis beneficiorum et servitiorum meritis nobis inpensis fideliter et inpendendis in futurum; huiusmodi conditione interposita, quod quascunque dicte possessionis Deaky vel ad se pertinentium desolationes, dampnificationes vel populorum libertates, quod absit, violationes factas per ipsum comitem Iakus vel suos officiales evidenter conprobare potuerimus vel in dimidietate utilitatum ipsius possessionis nobis aministrantium (!) diminutio vel inequalis divisio fieret manifeste aut transactis predictis decem annis ydem comes Iakus aliqua cautela inventa eandem possessionem Deaky indebite ulterius occupando remittere nobis et nostro monasterio pacifice nollet, in quingentis marcis argenti ante litis ingressum deponendis, salva portione iudicis, remaneat contra nos et nostrum monasterium coram quovis iudice eo facto, predictus etiam ofticiolatus ipsius possessionis filiis et heredibus ipsius Iakus, quod absit, si eundem infra spatium predictorum decem annorum diem vite extremum claudere contingeret, inanis habeatur et dicta nostra possessio libere ad nos et nostrum monasterium pleno iure revertatur; qui, si secus facerent, premissis in graviminibus incurrant ipso facto; hoc non pretermisso, quod quandocunque eundem dominum Syfridum vel suum successorem, prelatum nostri monasterii pro tempore constitutum in ambasiatum regni Hungarie destinaxent (!) ad aliquas partes extraneas, extunc populi ipsius ville Deaky sumpmam taxationis pecunie more aliorum iobagionum nostrorum ad huiusmodi expeditionem ratione expensarum petitam dare et solvere tenebuntur contradictione ipsius Iakus non obstante. In cuius constitutionis et ordinationis rei memoriam presentes litteras nostras pendentis sigilli nostri conventus munimine fecimus eidem emanari. Datum feria tertia proxima post festum Epiphaniarum Domini, anno eiusdem M° CCC° quinquagesimo septimo. [1357. jan. 10.]