Excellentissimo principi, domino Lodovico, Dei gracia illustri regi Hungarie, domino ipsorum, conventus monasterii Sancti Martini de Sacro Monte Panonie oraciones in Domino. Litteras vestras honore, quo decuit, recepimus in hec verba:||
Lodovicus, Dei gracia rex Hungarie, fidelibus suis, conventui Sancti Martini de Sacro Monte Panonie salutem et graciam. Dicit nobis religiosus vir, frater Petrus, abbas de Beel, quod Benedictus Varyo quosdam duos montes Lenchezer et Felkerth vocatos in territorio possessionis dicte ecclesie sue Nyul vocate existentes a tempore, cuius non exstaret memoria, semper ad ipsam ecclesiam suam omni iure pertinentes simul cum terris eorum arabilibus et aliis utilitatibus universis propria sua auctoritate et potencia pro se occupasset et nunc detineret occupatos in preiudicium ipsius ecclesie sue non modicum et iacturam. Super quo fidelitati vestre firmiter precipiendo mandamus, quatenus vestrum mittatis hominem pro testimonio fidedugnum, quo presente Laurencius de Zenthyvan vel Bakow de Fenyeufu aut Iacobus filius Ugrini de Peech aliis absentibus homo noster ab omnibus, quibus decet et licet, diligenter de premissis investigando sciat et inquirat omnimodam veritatem. Et post hec, prout vobis veritas constiterit premissorum, nobis fideliter rescribatis. Datum in Vyssegrad in festo Sancti Demetrii martiris, anno [Do]mini Mo CCCmo quinquagesimo septimo.||
Nos igitur preceptis vestre excellencie in omnibus, ut tenemur, obedientes, unacum predicto Bakow de Fenyeufu homine serenitatis vestre prefato nostrum hominem dominum Blasium plebanum ecclesie nostre de Olsuk pro testimonio ad premissa fideliter inquirenda duximus transmittendum. Qui demum ad nos reversi concorditer nobis retulerunt, quod ipsi feria sexta proxima ante festum [S]ancti Martini confessoris proxime nunc preterita in comitatu Iauriensi procedendo a nobilibus et ignobilibus ac ab aliis cuiusvis status et condicionis hominibus et specialiter ab incolis villarum, qui in dicto monte Felkerth vineas haberent plantatas, palam et oculte diligenter inquirentes talem rescivissent veritatem de premissis, quod idem Benedictus dictus Varyo predictum montem Felkerth vocatum in territorio dicte possessionis Nyul vocate existentem a tempore, cuius non extaret memoria, semper ad ipsum dominum, fratrem Petrum abbatem et suam ecclesiam omni iure pertinentem propria sua auctoritate et potencia pro se occupasset et adhuc teneret occupatum in preiudicium ecclesie ipsius domini abbatis et iacturam. Datum quarto die ipsius inquisicionis, anno Domini supradicto.||
[Külzetén:] Domino regi pro domino fratre Petro miseracione divina abbate ecclesie de Beel contra Benedictum dictum Varyo super occupacione et utensione montis Felkerch in territorio possessionis Nyul existentis relacio inquisicionis.