Serenissimo principi domino Lodovico, Dei gratia inclito regi Hungarie, domino ipsorum, conventus monasterii Sancti Martini de Sacro Monte Pannonie orationis in Filio Virginis gloriose. Litteras vestras inquisitorias pro fratre Petro, abbate de Beel, moverit vestra excellentia nos recepisse hunc tenorem continentes:||
Lodovicus, Dei gratia rex Hungarie, fidelibus suis conventui Sancti Martini de Sacro Monte Pannonie salutem et gratiam. Dicit nobis religiosus vir frater Petrus, abbas de Beel, quod possessio Harazty vocata in comitatu Vesprimiensi inter villas Zeuch et Kopuan vocatas habita et existens ex donatione et collatione Sancti regis Ladizlai ipsi ecclesie sue et per consequens sibi pertineret et deberet ex vigore et robore litteralium munimentorum pertinere, quam nunc Iohannes, Stephanus et Petrus filii Chenyg in parte occupassent et detinerent indebite occupatam. Super quo fidelitati vestre firmiter precipiendo mandamus, quatenus vestrum mittatis hominem pro testimonio fidedignum, quo presente Bakow de Fenyeufu vel Iacobus, filius Ugrini aut Paulus de Peech, aliis absentibus homo noster ab omnibus, quibus debet et licet et specialiter a Laurentio, filio Barouch, Dyonisio et Iohanne, filiis Dees et aliis nobilibus de Iary, posteritatibus et successoribus condam Iulad bani, qui eandem olim tenuisse asseritur, diligenter de premissis investigando sciat et inquirat omnimodam veritatem. Post hec prout vobis veritas premissorum constiterit, nobis fideliter rescribatis. Datum in Vysegrad in festo Beati Thome apostoli, anno Domini millesimo trecentesimo quinquagesimo septimo. [1357. dec. 21.]||
Nos igitur preceptis vestre excellentie in omnibus, ut tenemur, obedientes, una cum Iacobo, filio Ugrini, homine serenitatis vestre predicto, dominum Michaelem, plebanum ecclesie nostre de Nagrauosd, ad premissa inquirenda duximus dirigendum pro testimonio fidedignum. Qui demum ad nos reversi concorditer nobis retulerunt, quod ipsi feria quarta post octavas festi Epiphaniarum Domini proxime preteriti [1358. jan. 17.] in comitatibus Iauriensi et Vesprimiensi procedendo a nobilibus et ignobilibus ac ab aliis cuiusvis status et condicionis hominibus dictorum comitatuum, a quibus decens fuisset inquiri et specialiter a Laurentio, filio Barouch, Dyonisio et Iohanne, filiis Dees ac aliis nobilibus de Iary, posteritatibus predicti Iulad bani, inquirentes diligenter, talem rescivissent veritatem de premissis, quod possessio Harazty vocata in comitatu Wesprimiensi prelibato inter villas Zeuch et Kopuan vocatas existens, ex donatione et collatione supradicti Sancti Ladizlai regis ecclesie Beati Mauricii de Beel et per consequens dicto domino abbati de eadem vigore ... litteralium munimentorum pertineret et pertinere deberet, Iohannes, Stephanus, Petrus, filii Chenig de Ugod, quandam particulam eiusdem possessionis Harazty nunc occupatam indebite detinerent et detinendo uterentur in preiudicium ecclesie Beati Mauricii prenotati. Datum tertio die ipsius inquisitionis, anno Domini supradicto (!). [1358. jan. 19.]