Nos, conventus monasterii Sancti Martini de Sacro Monte Pannonie, damus pro memoria, quod Iohannes filius Symonis de Nostup famulus et procurator viri religiosi, domini Petri, abbatis monasteriide Beel ad nostram accedens presenciam exhibuit nobis quoddam privilegium preclare memorie domini Stephani regis, Geyse regis filii sigillo eiusdem in cedula pergamenea a tergo appenso, sed noviter discisso et corrupto roboratum metas et modum serviciorum possessionis dicti monasterii de Beel Ganna nuncupate inter alia comprehendens, cuius quidem tenorem olim domino Nicolao bone memorie tunc abbati eiusdem loci ad sue peticionis instanciam sub sigillo nostro pendenti transscriptum dinosscimur concessisse. Ipsius itaque privilegii exhibicione facta recognovit et nobis per modum publicacionis et confessionis significavit dolenter, quod cum ipse nuperrime, videlicet per feria quarta proxima post dominicam Letare nunc preterita per prefatum dominum suum Petrum abbatem ad causas ipsius et ecclesie sue in termino octavarum diei cinerum ventilandas et procurandas versus curiam regiam destinatus arrepto itinere ville Hothalm vocate appropiasset equs sub ipso habitus quodam horrore absterritus de via declinans et cespitans gravissime corruisset, per cuius casum ipse valde lesus et quedam pixis lignea plena litteralibus instrumentis et privilegiis monasterii antedicti et specialiter privilegium prenotatum utpote contra filios Iohannis de Zyman, adversarios dicti domini sui abbatis in premisso termino produci oportunum in se continens ad latus suum appensa frustatim comminuta et disrupta extitisset, inter que prememoratum sigillum dicti privilegii domini Stephani regis contritum et corruptum ac taliter destructum fuisset et existeret, quemadmodum nostris et omnium intuentium oculis appareret, petens nos humiliter et instanter, ut super huiusmodi sua recognicione et insinuacione premissorum nobis facta ad uberiorem rei cautelam sibi et dicto domino suo litteras nostras testimoniales concedere dignaremur. Cuius nos iuste peticioni favorabilem prebentes assensum presentes eisdem in testimonium duximus conferendas. Datum feria quinta proxima post predictam dominicam Letare, anno Domini Mo CCCo LXmo.