Serenissimo principi Lodovico, Dei gratia inclito regi Hungarie, domino ipsorum, conventus [monasteriij Sancti Martini de Sacro Monte Pannonie orationes in Filio Virginis continuas et devotas. Litteras vestre screnitatis pro religioso viro domino [fratri] Petro abbate de Beel et suo conventu ad inquisitiones inter alios consuetudinarios regni vestri actus legitime faciendas per anni circulum gratiose concessas congruo recepimus cum honore. Iuxta quarum continentiam una cum Michaele, filio Pauli de Mendzenth, homine maiestatis vestre, ad inquirendum fideliter de infrascriptis, hominem nostrum, fratrem Wernherum sacerdotem ex nobis unum pro testimonio destinavimus fidedignum. Qui demum ad nos reversi nobis uniformiter retulerunt, quod feria quarta proxima post dominicam Iudica [1360. márc. 25.] in villa Hothalm vocata et aliis villis circumadiacentibus, Wesprimiensis et Iaurieusis comitatum, procedendo, a nobilibus et ignobilibus ac aliis cuiusvis status et conditionis hominibus, a quibus decuisset inquiri, palam et occulte conscientiose et diligenter inquirendo talem investigassent et scivissent omnimodam veritatem, quod, cum Iohannes, filius Symonis de Nostup, famulus et procurator supradicti domini Petri abbatis de Beel, per eundem dominum suum ad causas ipsius et ecclesie suo in termino octavarum diei Cinerum [1360. febr. 26.] ventilandas et agendas versus curiam regiam destinatus feria quarta proxima post dominicam Letare nunc preterita [1360. márc. 18.] iter agens predicte ville Hothalm appropinquasset, equs (!) sub ipso habitus casualiter cespitando gravissime corruisset, per cuius ruinam idem Iohannes non modice lesus et quedam pixis lignea plena litteralibus instrumentis et privilegiis monasterii antedicti ad latus ipsius habita frustatim conminuta et disrupta fuissent, inter que sigillum privilegii inclite recordationis domini Stephani regis, Geyse regis filii, metas et ordinem servitiorum possessionis dicti monasterii Ganna nomine inter alia exponentis, contritum et disruptum ac tam in imagine quam in superscriptione seu circumferentia sui adeo elisum et destructum fuisset et existeret, ut vix legi valeat aut cognogci, quod etiam factum propter uberiorem rei cautelam dictus Iohannes illico in instanti plebano et populis de dicta villa Hotholm et aliis, quibus expedisset, publicasset et iam dictum privilegium cum suo sigillo, sicut perfertur, contrito et discisso eorum oculis demonstrasset. Datum tertio die inquisitionis predicte, anno Domini millesimo trecentesimo sexagesimo. [1360. márc. 27.]