Nos conventus monasterii Sancti Martini de Sacro Monte Pannonie damus pro memoria per presentes, quod religiosi viri fratres Petrus prior, Egidius custos, Petrus claviger et alter Egidius ac Benedictus conventuales monasterii Sancti Mauricii de Beel ad nostram presentiam personaliter accedendo per modum protestationis nobis significare curarunt, quod, ut ipsi percepissent, in causa illa, quam venerabilis et religiosus vir dominus frater Petrus, abbas dicti monasterii, prelatus eorum in presentia magnifici viri Nicolai Konth, regni Hungarie palatini, absque ipsorum scitu et assensu, ut dixerunt, movisset et haberet contra honorabile capitulum Wesprimiensis ecclesie super quandam possessionem Palaznuk vocate, iuramentum in proxime venturis octavis festi Nativitatis Beate Marie virginis [1360. szept. 15.] cum certo personarum numero deponendum eidem capitulo impositum seu adiudicatum sit per sententiam dicti domini palatini iudicis in hac causa. Quapropter asserentes dictam possessionem Palaznuk ad dictum monasterium eorum mediantibus instrumentis efficacissimis pertinere, formidantesque, ut affirmabant, per predicti iuramenti memorato capitulo assignati prestationem non modicum derogamen suo predicto monasterio generari posse, seu etiam imininere, prelibatum capitulum ab ipsius possessionis per huiusmodi iuramentum obtentione, usurpatione, detentione ac se de eadem quovis modo totali vel partiali intromissione, nec non prenotatum dominum fratrem Petrum, abbatem eorum, ab eiusdem possessionis amissione et quavis alienatione nominibus suis et eiusdem monasterii sui prohibuerunt contradicendo et contradixerunt inhibendo coram nobis. In cuiusmodi protestationis et prohibitionis eorum testimonium presentes litteras nostras eisdem concessimus conmuni iustitia requirente. Datum in festo Sancti Augustini episcopi et confessoris, anno Domini Mo CCCo sexagesimo. [1360. aug. 28.]