Nos comes Stephanus Bubek, iudex curie serenissimi principis domini Lodovici, Dei gratia regis Hungarie, memorie conmendantes tenore presentium significamus, quibus expedit, universis, quod Stephanus litteratus pro religioso viro domino Seffrido, abbate monasterii Sancti Martini de Sacro Monte Panonie, cum procuratoriis litteris eiusdem iuxta continentiam litterarum capituli ecclesie Vesprimiensis citatoriarum, seriem litterarum regalium de verbo ad verbum in se continentium, in octavis festi Beati Georgii martiris proxime preteritis [1361. máj. 1.] ad nostram accedendo presentiam, contra magistrum Petrum, fratrem Sebus de Sancto Georgio easdem litteras capituli Wesprimiensis, asserens actionem et propositionem eiusdem domini abbatis in eisdem contineri, nobis presentavit, in quibus inter cetera videramus haberi, quod religiosus vir dominus Seffridus, abbas Sancti Martini de Sacro Monte Panonie, domino nostro regi et domine nostre regine, genitricis sue, conquestus fuisset, eo modo, quod, licet ipse a magistro Petro, fratre Sebus de Sancto Georgio, in figura iudicii magnifici viri domini Nicolai Kont palatini in congregatione sua generali universitati nobilium comitatus Posoniensis feria secunda proxima post octavas festi Nativitatis Virginis gloriose in anno Domini millesimo trecentesimo quinquagesimo octavo [1358. szept. 17.] in civitate Posoniensi celebrata tertiam partem tributi in Chutertukhel exigi consueti omni iuris tramite reoptinuisset, idem tamen magister Petrus dicto homine predicti monasterii de tributo prefato, dictam tertiam partem eidem monasterio adiudicatam et statutam de novo pro se occupasset et detinere non cessaret potentialiter occupatam; hiisque perceptis ipse dominus noster rex fidelibus suis predicto capitulo Wesprimiensi litteratorie mandasset, quatenus ipsorum mitterent hominem pro testimonio fide dignum, quo presente Ladislaus, filius Valentini, de Nema, homo suus regius, predictum magistrum Petrum contra eundem dominum abbatem ad octavas festi Beati Georgii martiris tunc venturas in suam regiam citaret presentiam rationem huiusmodi occupationis et detentionis prefate tertie partis tributarie efficaciter et absque ulteriori dilatione coram sua regia maiestate et suis baronibus redditurum et post hec ipsius citationis seriem cum nomine citati et termino assignato sibi fideliter rescriberet capitulum Wesprimiense prenotatum.||
Tandemque super premissis ipsum capitulum taliter rescripserat ipsi regie maiestati, ut ipsi una cum Ladislao, filio Valentini, homine sue regie maiestatis, magistrum Nicolaum socium et concanonicum ipsorum, ad premissa peragenda pro testimonio destinassent; qui demum ad ipsum capitulum reversi eidem concorditer retulissent, quod ipsi feria sexta proxima post octavas festi Passce Domini nunc preterita [1361. ápr. 9.] ad dictam possessionem magistri Petri, fratris Sebus, Chetertukhel vocatam accessissent, ubi eundem magistrum Petrum contra dominum Seffridum abbatem rationem occupationis et detentionis tertie partis tributi in dicta Chetertukhel habiti absque ulteriori dilatione efficaciter redditurum ad dictas octavas festi Beati Georgii martiris in regie maiestatis presentiam citavissent.||
Quibus perceptis, quia Iacobus, filius Iwan, pro eodem magistro Petro, fratre Sebus, cum procuratoriis litteris comitis capelle regie exurgendo per eundem magistrum Petrum hominem prefati monasterii Sancti Martini de prescripto tributo erectum non fuisse, nec ipsam tertiam partem eiusdem tributi pro se potentialiter occupasse affirmabat, ideo premissam tertiam partem predicti tributi ipsi domino Seffrido abbati et in persona eiusdem homini suo modo inferius declarato statui debere legitimo petente procuratore eiusdem domini abbatis decernentes, amicis nostris, capitulo ecclesie Posoniensi litteratorie scribentes eorum amicitiam petieramus reverenter, quatenus ipsorum mitterent hominem pro testimonio fide dignum, quo presente Ladislaus, filius Valentini, vel Laurentius, filius Iohannis, de Nema, an Mychael, filius Pauli, de Mendzenth, sive Kopaz, filius Petri, de dicta Nema, aliis absentibus homo regius in octavis festi Nativitatis Beati Iohannis Baptiste proxime tunc venturis [1361. júl. 1.] ad faciem predicte possessionis Chetertukhel vocate accedentes, ibidemque convocatis vicinis et conmetaneis suis universis, tertiam partem tributi in eadem exigi consueti statueret et conmitteret predicto domino Seffrido abbati et suo monasterio eo iure, quo eis dinossceretur pertinere possidendam et habendam, contradictione ipsius magistri Petri non obstante, alii autem, si qui contradictores fierent, citarent ipsos contra eundem dominum abbatem ad octavas festi Beati Iacobi apostoli similiter proxime tunc venturas [1361. aug. 1.] in presentiam regie maiestatis rationem contradictionis eorum reddituros et post hec totius processus seriem, prout fieret expediens, ad easdem octavas festi Iacobi apostoli regie fideliter rescriberet maiestati capitulum Posoniense prenotatum.||
Tandem ipso termino adveniente frater Paulus monachus pro predicto domino Seffrido abbate cum procuratoriis litteris eiusdem ad nostrum iudiciarium accedens conspectum, litteras prefati capituli Posoniensis super premissis dicto domino nostro regi rescriptionales nobis presentavit, in quibus expresse habebatur, quod ipsum capitulum Posoniense receptis litteris nostris una cum Kopaz, homine regio, dominum Iacobum, chori ecclesie ipsorum capellanum, ad ipsam statutionem exequendam pro testimonio duxissent destinandum, qui deinde ad ipsum capitulum reversi eidem concorditer retulissent in hunc modum, quod ipsi in octavis festi Nativitatis Beati Iohannis Baptiste proxime nunc preteritis ad faciem possessionis Cheturtukhel vocate accessissent, ibique convocatis vicinis et conmetaneis universis tertiam partem tributi in eadem. exigi consueti domino Seffrido, abbati Sancti Martini de Sacro Monte Pannonie et suo monasterio eo iure, quo eis dinossceretur pertinere, statuissent nullo ibi astante contradictore.||
Unde, quia memorata tertia pars tributi in predicta possessione Chetertukhel vocata exigi consueti convocatis vicinis et conmetaneis universis per predictum hominum regium presente testimonio pretitulati capituli ecclesie Posoniensis preallegato domino Seffrido abbati et suo monasterio predicto eo iure, quo eis dinossceretur pertinere, nullo inibi astante contradictore statuta fuisse ex serie premissarum litterarum capituli ecclesie Posoniensis reperiebatur, pro eo eandem tertiam partem ipsius tributi in predicta possessione Chetertukhel exigi consueti ipsi domino Seffrido abbati et suo monasterio eo iure, quo ipsis dinosscitur pertinere, auctoritate nostra iudiciaria conmisimus et reliquimus tenere, possidere et habere sine preiudicio iuris alieni. In cuius rei memoriam, firmitatemque perpetuam presentes litteras nostras privilegiales pendentis et autentici sigilli nostri munimine roboratas eisdem domino abbati et suo monasterio duximus concedendas. Datum in Wyssegrad, vicesimo die termini prenotati, anno Domini millesimo trecentesimo sexagesimo primo. [1361. aug. 20.]