Nos Nicolaus Kont, regni Hungarie palatinus et iudex Comanorum, memorie commendantes tenore presentium significamus, quibus expedit, universis, quod nobis vigesimo [sexto ?] die octavarum festi Beati Mychaelis archangeli in anno proxime transacto preteritis (!) [1360. okt. 31?] iudiciario tribunali sedentibus, causalesque processus quorumlibet coram nobis litigantium sua moderata equitate discutientibus, inter ceteros causidicos Stephanus litteratus pro domino Seffrido abbate monasterii Sancti Martini de Sacro Monte Panonie cum procuratoriis litteris eiusdem ad nostram veniendo presentiam contra Nicolaum, filium Sebastiani, de Kys-Rauazd quasdam sex litteras citatorias, duas scilicet capituli ecclesie Vesprimiensis et tres capituli Iauriensis ac unam conventus Symigiensis, totidemque iudiciales, unam videlicet comitis Nicolai, filii Ugrini, pridem iudicis curie et aliam eiusdem domini regis, necnon quatuor comitis Stephani Bubek, similiter iudicis curie regie, in diversis annis, terminis, sub variisque formis confectas nostro iudiciario examini curarat exhibere, per quarum series predictum Nicolaum, filium Sebastiani, primo ad octavas festi Beati Iacobi apostoli in anno Domini millesimo trecentesimo quinquagesimo octavo, [1358. aug. 1.] secundo vero ad octavas festi Epiphanie Domini, [1359. jan. 13.] tertio autem ad diem Medii Quadragesime, [1359. márc. 27.] quarto siquidem ad octavas festi Penthecostes, [1359. jún. 16.] quinto autem ad octavas festi Beati Iacobi apostoli, [1359. aug. 1.] sexto vero et ultimo ad predictas octavas festi Beati Mychaelis archangeli, [1359. okt. 6.] post se se tunc proxime consequenter transactas mediantibus regiis et dictorum Vesprimiensis ac Iauriensis capitulorum, necnon conventus Symigiensis ecclesiarum hominibus ad regiam presentiam legitime citatum extitisse et ad neutrum dictorum sex terminorum ad eorundem domini regis et suorum iudicum predictorum presentiam venisse, nec misisse, seque adversus ipsum dominum abbatem pro premissis sex terminorum obmissionibus in singulis iudiciis agravari permisisse evidenter declararat, petens idem Stephanus litteratus, procurator ipsius domini abbatis, super actione et acquisitione eiusdem, super eo videlicet, quod ipse Nicolaus, filius Sebastiani, portionem possessionarium dicti domini abbatis et ecclesie memorate in ipsa possessione Kys-Rauazd vocata habitam potentionaliter sua propria auctoritate occupasset et occupatam detineret, Nicolaumque, famulum ipsius domini abbatis, nobilem iobagionem dicti monasterii Sancti Martini, suis culpis nullis requirentibus interemisset, ex parte eiusdem iudicium et iustitiam, necnon de dictis iudiciis satisfactionem per nos eidem elargari equitate suadente.||
Verum, quia memoratus Nicolaus, filius Sebastiani, super dicto facto principali perhemptorie responsurus, rationem redditurus ac de dictis iudiciis, in quibus, ut prefertur, dinossceretur fore aggravatus, nobis et parti adverse satisfacturus nobis, regnique nobilibus nobiscum nunc adiudicantibus per nostrum et capituli Vesprimiensis homines contra ipsum dominum abbatem legitimo nostram in presentiam evocandus fore censebatur, idcirco pretacto capitulo Vesprimiensi scribendo eorum amicitiam petieramus reverenter, quatenus eorum mittererent hominem pro testimonio fide dignum, quo presente homo noster in presentibus infradeclarandus dictum Nicolaum, filium Sebastiani, in facie dicte possessionis Kys-Rauazd vocate secundo die quindenarum festi Beati Martini confessoris proxime preteriti [1360. nov. 26.] contra memoratum dominum abbatem ad octavas festi Epiphaniarum Domini proxime tunc venturas [1361. jan. 13.] ad nostram evocaret presentiam insinuando ibidem, ut, si venerit et de ipso facto principale perhemtoria responsione mediante se emendaret et de dictis iudiciis modo premisso in se agregatis satisfaceret, bene quidem, alioquin non obstante eiusdem absentia et contumatia contra ipsius rebellionem iudiciariam procedemus per censuram et post hec ipsius evocationis seriem cum nomine evocati ad dictas octavas festi Epiphaniarum, prout fieret oportunum, nobis amicabiliter rescriberet capitulum Wesprimiense prenotatum.||
Ipsis siquidem octavis festi Epiphanie Domini adherentibus memoratus Stephanus litteratus pro ipso domino abbate, domino suo cum procuratoriis litteris eiusdem nostrum iudiciarium adeundo conspectum litteras dicti capituli super ipsa evocatione confectas nobis presentavit, in quibus inter alia habebatur, quod idem capitulum Wesprimiense nostris amicabilibus petitionibus aquiesscens, una cum Laurentio, filio Iohannis, de Nema, homine nostro, discretum virum Petrum, prebendarium ecclesie eorum, ad ipsam evocationem faciendam pro testimonio transmisissent fide dignum, qui tandem ad eos reversi ipsis consona voce retulissent, quod ipsi secundo die festi Beati Martini confessoris de novo preteriti ad faciem possessionarie portionis Nicolai, filii Sebastiani, Kysrauazd vocate accessissent, ibique eundem Nicolaum, filium Sebastiani, contra predictum dominum Seffridum abbatem ad ipsos octavas festi Epiphanie Domini nostram in presentiam de dicto facto principali responsurum ac de ipsis iudicis satisfacturum evocassent.||
Ad quas quidem octavas festi Epiphanie prefatus Nicolaus, filius Sebastiani, de Kysrauazd non venerat, nec miserat per ipsum Stephanum Litteratum, procuratorem ipsius domini abbatis legitimum, viginti tribus diebus continuis legitime expectatus coram nobis, postulans idem Stephanus litteratus dicto domino abbati, domino suo iudicium et iustitiam per nos ex parte ipsius Nicolai inpertiri equitate suadente.||
Unde, quia de regni consuetudine evocationes consultivas trine forenses sequi debuerant proclamationes, iudicibus etiam iuri rebelles ad tramitem iustitie proclamari facere maxime pietatis iudicium fore reputatur, ut ne in proferenda sententia festini fore viderentur, idcirco amititiam prefati capituli Vesprimiensis litteratorie petieramus reverenter, quatenus eorum mitterent hominem pro testimonio fide dignum, quo presente homo noster infradenotandus annotatum Nicolaum, filium Sebastiani, super premisso facto principali perhemptorie responsurum, rationemque pretensurum ac de omnibus iudiciorum gravaminibus, modo quo supra, in se aggregatorum nobis et parti adverse satisfacturum in tribus foris conprovincialibus ad quintumdecimum diem ipsius ultime terne forensis proclamationis nostram in presentiam puplice (!) faceret proclamari insinuando ibidem, ut, si venerit et de premissis perhemptorie responderet, rationemque recideret efficacem, necnon de ipsis iudiciis nobis et parti adverse satisfaceret, bene quidem, alioquin non obstante ipsius absentia et rebellione iudiciariam contra ipsum procederemus per censuram finem debitum in causa premissa inponentes et abhinc ipsius trine forensis proclamationis seriem cum nomine proclamati ad predictum quintumdecimum diem dicte ultime forensis proclamationis nobis amicabiliter rescriberet capitulum Vesprimiense prenotatum.||
Denique quintodecimo die ferie sexte proxime post quindenas festi Passce occurrente [1361. ápr. 30.] prelibatus Stephanus litteratus pro iam dicto domino Seffrido abbate cum procuratoriis litteris eiusdem nostrum iudiciarium adeundo conspectum litteras superius nominati capituli ecclesie Vesprimiensis super ipsa forensi proclamatione rescriptionales nobis demonstravit, in quibus prelibatum Nicolaum, filium Sebastiani de Kys-Rauazd per Ladislaum, filium Valentini, de Gymolth, hominem nostrum et magistrum Nicolaum, canonicum eiusdem ecclesie, primo feria quinta proxima post festum Passce Domini [1361. ápr. 1.] in villa dicti monasterii Sancti Martini Olsuk vocate, secundo vero feria tertia post octavas eiusdem festi Passce Domini [1361. ápr. 6.] in villa Kamaron, tertio vero et ultimo feria sexta post quindenas dicti festi Passce Domini nunc proxime [1361. ápr. 16.] post se se consequenter transactis in civitate Iauriensi, in ternis videlicet foris conprovincialibus tunc ipsis diebus successive celebratis super premisso facto principali perhemptorie responsurum, cautionemque excusabilem pretensurum ac de omnibus pretactorum iudiciorum gravaminibus nobis et parti adverse satisfacturum contra eundem dominum abbatem ad predictum quintumdecimum diem quindenarum ferie sexte proclamate nostram in presentiam iuxta annotatam nostram iuridicam conmissionem puplice proclamatum extitisse conperimus manifeste. Qui quidem Nicolaus, filius Sebastiani, nec ad ipsum quintumdecimum diem eiusdem ultime forensis proclamationis contumatia sua requirente dicto Stephano litterato, prefati domini abbatis procuratore legitimo, in persona eiusdem viginti sex diebus continuis [1361. máj. 25.] coram nobis expectante in sue culpabilitatis iudicium venire vel mittere non curavit, se a facie iuris et iustitie penitus abstinendo, petens idem Stephanus litteratus dicta procuratoria auctoritate in persona ipsius domini abbatis eidem ex parte prefati Nicolai, filii Sebastiani, iuris rigorem super omnibus premissis per nos impertiri equitate suadente.||
Verum, quia prelibatus Nicolaus, filius Sebastiani, de Kys-Rauazd super annotata potentiaria occupatione et detentione possessionaria ac interemptione nobilis iobagionis dicti domini abbatis perhemptorie responsurus, rationemque redditurus, necnon de premissis iudiciorum honeribus, quo supra, in se aggregatis nobis et parti adverse satisfacturus contra iam dictum dominum abbatem toties citatus, tandemque evocatus, in trinisque foris conprovincialibus publice proclamatus contumatia sua requirente venire vel mittere non curavit, in sue culpabilitatis indicium se a facie iuris et iustitie penitus absentando, pro eo baronum, regnique nobilium in adiudicatione ipsius cause nobiscum adherentium moderato inducti consilio eundem Nicolaum, filium Sebastiani, previis rationibus adversus ipsum dominum abbatem monasterii Sancti Martini de Sacro Monte Panonie in facto potentiali, ex eoque in sententia capituli et amissione omnium possessionum et possessionarium portionum ipsius Nicolai, filii Sebastiani, ubilibet eundem proprie contingentium ac bonorum in duabus partibus nostris iudiciariis, in tertia vero parte dicti sui adversarii manibus devolvendarum nostra iudiciaria auctoritate decrevimus et conmisimus convictum extitisse presentium patrocinio mediante. Datum in Vissegrad, vigesimo septimo die termini prenotati, anno Domini millesimo trecentesimo sexagesimo primo. [1361. máj. 26.]