Nos Lodovicus, Dei gratia rex Hungarie, memorie conmendantes tenore presentium signiticamus, quibus expedit universis, quod ad nostram personaliter accedendo presentiam venerabilis et religiosus vir capellanus noster dilectus et fidelis, frater Seff[ridus, abbas] monasterii Sancti Martini de Sacro Monte Panonie, suis nobis humilibus conquestione et petitione detexit, quod plures et presertim Nicolaus et Guillermus bone memorie abbates, inmediati predecessores sui, iura et facta dicti monasterii non, ut debuissent, viriliter et utiliter prosequentes, [sed] in multis inutiliter negligentes, cum diversis, tam ecclesiasticis, quam secularibus personis possessionarias permutationes fecissent, cum aliis conpositiones seu modos et conditiones concordiarum nocivos et inutiles inivissent et acceptassent, nonnulla etiam iura, proventus et reditus diversis v[ocabulis] nuncupata seu nuncupatas per litteras eorum quibusdam nobilibus et aliis hominibus datas et concessas ab ipso monasterio alienassent et distraxissent et ad obligamina gravia et inpossibilia se et dictum monasterium inservand[is huiusmo]di conpositionibus et distractionibus inordin[atis] et indebit[is per sua]s et conventus eorum ac etiam quorumdam capitulorum et aliorum conventuum litteras astrinxissent et alia diversa et varia huiusmodi et hiis similia inordinata et illicita absque consensu, scitu et voluntate regie [maiestatis, ad quam eiusdem] monasterii patronatus pertinere din[oscitur, fecisse]nt, assumpsissent et contraxissent in preiudicium moderni abbatis, conventus ac monasterii predictorum non modicum et iacturam.||
Qua videlicet conquestione premissa nostre maiestati supplicare curav[it humili] precum instantia [idem abbas, ut] predictas permutationes, conpositiones seu conditiones, [obl]igationes, alienationesque et quosvis alios distractus absque nutu patroni in eiusdem monasterii lesionem intolerabilem atque dampnum per dictos predecessores suos inconsiderate et inprovide factas, assumptos, [seu] contractos auctoritate regia et patronatus indempnitati sepedicti monasterii misericorditer consulentes irritare, revocare et cassare nostris litteris dignaremur.||
Nos igitur prenotati fratris Seffridi abbatis piis, iustis et honestis supplicationibus, ut regiam decet maiestatem et non [solum] ad dicti monasterii, [sed et a]d omnium ecclesiarum regni nostri proventum et indempnitatem dirigendum, conservandum et promovendum animo conpassibili liberaliter indinati, ut prefatus abbas ac conventus et monasterium illis possessionibus, libertatibus et iuribus, proventibusque et reditibus gaudere valeant, que [et qui tam Sanctissimo]rum Stephani et Ladislai, quam aliorum illustrissimorum regum Hungarie, proavorum nostrorum ac aliorum fidelium Christi donationibus, collationibus et concessionibus eidem monasterio advenisse et ex antiquo pertinuisse noscuntur, quicquid per antedictos quoscunque predecessores iamdicti Seffridi abbatis et conventus eorum in premissis omnibus et singulis possessionum permutationibus, conpositionum illicitarum ac conditionum et obligaminum acceptationibus, iurium, reddituum et proventuum, tam spiritualium quam temporalium quibusvis nominibus vocatorum alienationibus vel resignationibus et generaliter aliis quibuslibet nocivis, inpossibilibusque distractibus absque patroni consensu et scitu, inordinate et indebite dinosscitur et est factum, simul litteris et munimentis quorumlibet capitulorum aut conventuum et collegiorum super huiusmodi confectis quovis modo presentium litterarum nostrarum vigore cassantes, annullantes et in irritum [revocan]tes [de]cernimus easdem litteras et munimenta quecunque et quicquid ex hiis vel ob ea secutum est contra presentes frivola, inania, cassa et; ubicunque exhibita fuerint vigoribus omnimodis caritura, prout etiam premissam gratiam per alias litteras nostras [anu]leo sigillo nostro cons[igni]tas feria tertia proxima post festum Nativitatis Beati Iohannis Baptiste in anno Domini millesimo trecentesimo quinquagesimo octavo [1358. jún. 26.] in Wissegrad emanatas dicto domino abbati et suo monasterio fecisse dinosscimur in forma consimili et tenore. Datum in Wissegrad, in festo Beate Lucie virginis et martiris, anno [Domini] millesimo [trecentesimo] sexagesimo primo. [1361. dec. 13.]