Nos conventus monasterii Sancti Egidii de Symigio memorie conmendamus, quod fratre Paulo pro religiosis viris domino Syffrido abbate et conventu monasterii Sancti Martini de Sacro Monte Pannonie cum procuratoriis litteris eorundem ab una, item magistro Antymo, filio Beke, filii Lanchrery de Tapson personaliter parte ex altera in nostri presentia constitutis prefatus frater Paulus in personis domini Syffridi abbatis et sui conventus predictorum confessus extitit viva voce, quod memoratus magister Antymus tam super facto detentionis et pro se occupationis decimarum de possessionibus suis in comitatu Symigiensi habitis, eisdem domino abbati et conventui a decem et octo annis preteritis usque ad presens tempus provenire debitarum, quam etiam de iudicio unius marce, in quo contra eosdem convictus extitisset, ipsis satisfactionem et emendationem iuxta proborum virorum ordinationem amicabilem inpendisset. Super quibus ipse frater Paulus vice et nomine, quorum supra, eundem magistrum Anthymum auctoritate procuratoria expeditum reddidit et per omnia perpetuo absolutum; e converso autem idem magister Anthymus sponte et expresse promisit et assumpsit coram nobis se ex tunc et deinceps nunquam premissas decimas possessionum suarum temere detenturum vel ad easdem quovis modo intromissurum absque concessione et beneplacito domini Syffridi abbatis et conventus prefatorum, sed easdem amicabiliter et pacifice decimatoribus eorundem extradari et exsolvi facturum cum effectu. Datum in festo Sancti Galli abbatis, anno Domini Mo CCCo sexagesimo quarto. [1364. okt. 16.]