Nos conventus monasterii Sancti Egidii de Symigio memorie conmendamus, quod fratre Paulo pro religioso viro domino Syffrido, abbate monasterii Sancti Martini de Sacro Monte Pannonie, cum procuratoriis litteris eiusdem ab una, ex altera autem parte Petro, filio Cosme, de Feyreghaz, comitatus Symigiensis, personaliter in nostri presentia constitutis, prefatus frater Paulus auctoritate procuratoria antedicta in persona dicti domini abbatis possessionariam portionem pretacti monasterii Sancti Martini in prescripta possessione Feyreghaz vocata habitam cum terris arabilibus, fenetis, vinetis et aliis quibuslibet utilitatibus, pertinentiisque suis predicto Petro, filio Cosme, locavit, conmisit et assignavit nomine feudi possidere, regere et tenere ac pro posse suo decorare a dato presentium per decem annorum decursum proxime consequenter venturorum, exceptis dumtaxat et memorato monasterio reservatis iuribus decimalibus quibuslibet exinde provenientibus, ita videlicet, quod idem Petrus, filius Cosme, pro conservatione et usu omnium premissorum singulis annis in octavis festi Beati Georgii martiris unum florenum auri seu centum denarios monete pro tempore currentis prefato domino Syffrido abbati vel suis legitimis procuratoribus solvere tenebitur coram nobis, penam dupli pretaxate pecunie incursurus, si quando solutionem huiusmodi perficere negligeret, vel differret suo termino deputato; dictis denique decem annis evolutis prescripta portio possessionaria indempniter, libere et absque difficultate qualibet ad manus prenotati domini et sue ecclesie revertetur, prout ad premissa omnia supradictus Petrus, filius Cosme, se obligavit sponte et firmiter coram nobis. Datum in festo Sancti Galli abbatis et confessoris, anno Domini Mo CCCo sexagesimo quarto. [1364. okt. 16.]