Lodovicus, Dei gratia rex Hungarie, fidelibus suis conventui Sancti Benedicti de iuxta Gron salutem et gratiam. Conqueritur nobis et domine, regine genitrici nostre karissime, frater Paulus, abbas de Beel, quod quamplures mercatores et alii homines cum rebus eorum venalibus more solito et antiquo ad et per locum tributi monasterii sui in civitate reginali Baath vocata habiti proficisci et transire debentes ac viatores derelictis veris et consuetis viis versus dictam civitatem dirigentibus, per alias vias indebitas et insolitas declinando ad locum dicti tributi pergere recusarent in suum et monasterii sui pergrande preiudicium et iacturam. Super qua fidelitati vestre firmiter precipiendo mandamus, quatenus vestrum mittatis hominem pro testimonio fide dignum, quo presente Ladislaus, filius Valentini vel Kopaz, filius Petri, de Nema aut Lorandus de Zyrk sive Iohannes, filius Petri seu Stephanus, filius Iohannis, de Paznan, aliis absentibus homo noster totiens quotiens pro parte dicti abbatis ad id fueritis requisiti, in comitatu Borsodiensi et aliis locis oportunis publice verbo nostre maiestatis faciat divulgari, ut universi mercatores et alii homines prenotati, postpositis predictis indebitis et insolitis viis novis, per vias veras et prius semper consuetas ad locum prescripti tributi et fori accedant et tributum, ut tenentur, exsolvant occasione qualibet procul mota, aliud facere non audentes sub nostre indignationis incursu in premissis, alioquin, si qui in huiusmodo iniustis viis et extraneis procedentes reperti in rebus vel personis ipsorum aliquam molestiam incurrerint forsitan atque dampna, nobis tandem non poterunt imputare. Si qui autem nobiles vel alii homines possessionati impedimentum vel resistentiam aliqualem facere presumerent in predictis, evocet ipsos contra prescriptum abbatem in nostram presentiam ad terminum conpetentem absque crastinatione super huiusmodi eorum temeritate peremptorie responsuros. Et post hac totiens quotiens fuerit oportunum, ipsarum evocationem et totius facti seriem modo suo nobis fideliter rescribatis. Datum in Wyssegrad, secundo die festi Decollationis Beati Iohannis Baptiste, anno Domini Mo CCCo sexagesimo sexto. [1366. aug. 30.]