Excellentissimo principi et domino suo gratioso, domino Ladovico, Dei gratia incliti regi Hungarie, conventus monasterii Sancti Martini de Sacro Monte Pannonie orationes in Christo assiduas et devotas. Litteris excellentie vestre pro viro religioso domino Paulo, abbate de Beel, ad prohibitiones inter cetera legitime faciendas per anni circulum generalibus omni, qua decuit, reverentia et honore receptis, una cum Lorando, filio Iohannis de Zyrk, in eisdem litteris inter alios nominato homine vestro, nostrum hominem Andream sacerdotem, vicarium plebani ecclesie Beate Marie de Olsuk, ad infrascriptam prohibitionem pro testimonio transmisimus fidedignum. Qui demum ad nos reversi concorditer retulerunt, quod ipsi feria tertia preterita, videlicet in festo Commemorationis Sancti Pauli apostoli, [1366. jún. 30.] ad civitatem Kamaroniensem accedendo, Petrum, filium magistri Nicolai filii Donch, de ipso Kamaron ac quoslibet officiales tributarios et familiares eiusdem, ne institores seu mercatores quoscunque ad forum in dicta civitate celebrari consuetum venientes indebitis et inconsuetis exactionibus molestent et turbent, sicut ex novo facere incepissent in ipsius domini abbatis et tributi sui in premisso foro recipi soliti derogamen, prohibuissent contradicendo manifeste, regni vestri iure requirente. Datum tertio die prohibitionis eiusdem, anno Domini Mo CCCo LXo sexto. [1366. júl. 2.]