Urbanus episcopus, servus servorum Dei, dilecto filio ... abbati monasterii Sancti Martini Pannonie, Iauriensis diocesis, salutem et apostolicam benedictionem. Dudum, videlicet XV. Kal. Martii, [1369. febr. 15.] pontificatus nostri anno septimo per nostras litteras tue discretioni mandavimus, quod per te vel alium seu alios sexagesimam omnium fructuum, reddituum et proventuum quorumlibet monasteriorum ac prioratuum, dignitatum, officiorum, administrationum et aliorum beneficiorum, quocumque nomine censerentur, monachorum nigrorum et alborum ordinis Sancti Benedicti ab eorum abbatibus, prioribus, prepositis, decanis, aliisque prelatis et monachis huiusmodi monasteria, prioratus, dignitates, administrationes et beneficia obtinentibus, quocumque nomine nuncuparentur ac capitulis ecclesiarum cathedrensium dictorum monachorum et conventibus eorundem monasteriorum et prioratuum exemptorum et non exemptorum eiusdem ordinis certarum partium virorum dumtaxat, certis personis, monasteriis et locis exceptis, pro reedificatione seu reparatione ecclesie et monasterii Casinensis, ecclesie Romane immediate subiecti, nullius diocesis, duobus annis ex tunc proxime secuturis in festo Omnium Sanctorum exigeres et levares, contradictores per censuram ecclesiasticam et etiam sequestrationem huiusmodi reddituum et proventuum appellatione postposita compescendo ac voluimus, quod monetam, quam reciperes seu recipi faceres bone memorie Guillermo, episcopo Sabinensi, sancte Romane ecclesie cardinali, tunc in humanis agenti ad Romanam curiam per viam cambii vel alium tutum modum destinare curares, per eum postmodum ad predictum Casinense monasterium transmittendum, prout in eisdem litteris plenius continetur. Cum autem, sicut Domino placuit, idem Guillermus cardinalis post datum dictarum litterarum et ante supradictum terminum fuerit vita functus, eidem discretioni per apostolica scripta mandamus, quatinus omnem pecuniam, quam pro dicta sexagesima recepisti seu recipi fecisti aut recipies et recipi facies in futurum, dilectis filiis nobili viro Nicolao Iacobi militi et Benedicti Neretii de Albertis, civi Florentini vel eorum sociis et procuratoribus aut alicui eorundem nomine aliorum studeas celeriter assignare. Nos enim dictis Nicolao et Benedicto et sociis et procuratoribus huiusmodi pecuniam a te vel aliis nomine tuo recipiendi ac te et alios, a quibus ipsam receperint, de receptis absolvendi et quietandi plenam concessimus per nostras litteras facultatem. Volumus autem, quod de hiis, que de predictis prefatis Nicolao et Benedicto seu sociis aut procuratoribus assignaveris, confici facias duo eiusdem tenoris publica instrumenta, quorum altero penes te retento, reliquum... camerario nostro studeas destinare. Ceterum volumus, quod transacto festo Omnium Sanctorum proxime futuro librum omnium receptorum ac datorum, assignatorum et expensorum de sexagesima predicta, in quo contineatur, quid seu quantum [quis] et in hoc obnoxius solverit et nomina eorum, qui solvere forsan neglexerint et quantum teneantur solvere, studeas supradictis sociis infra sex mensium post dictum festum Omnium Sanctorum proxime futurum secuturorum spatium assignare et ad denuntiationem et aggravationem excommunicationis, quam iidem non solventes incurrerint, procedere et nobis significare quicquid feceris in premissis. Datum apud Montem ... VI. Id. pontificatus nostri anno octavo. [1370. máj. 10.]