Nos Nicolaus Gara, regni Hungarie palatinus et iudex Comanorum, memorie commendamus, quod in congregatione nostra generali universitati nobilium comitatus Borsyensis feria secunda proxima post festum Corporis Christi [1381. jún. 17.] prope civitatem Bors vocatam celebrata religiosus vir, dominus frater Paulus, abbas de Beel ac Iacobus, iudex civitatis reginalis Bath vocate, sua et concivium suorum in personis de medio aliorum exsurgendo proposuerunt eo modo, quod mercatores, institores et alii viatores, qui prius semper cum eorum rebus venalibus et mercemoniis de villa Solyumus vocata ad dictam civitatem Baath et locum tributi dicte ecclesie de Beel inibi exigi consueti transire, ipsumque tributum solvere et sic ad villas Baka vocatas progredi more ab antiquo consuevissent et de iure tenerentur, derelictis suis huiusmodi iustis gressibus, per aliam viam, de dicta videlicet villa Solyumus ad Baka ducentem, a qua ipsi antea semper per tributarium predicte ecclesie prohiberi et coerceri consuevissent, de novo, videlicet eo tempore, quo magister Iwan, filius Nelepch, castrum Lewa tenuisset, eodem ipsos indebite confortante, a civitate et loco tributi predictis se retrahendo procedere incepissent et procederent incessanter in magnum dampnum et detrimentum perceptoris dicti tributi et deteriorationem prioris boni status non modicam civitatis prenotate; et hoc comiti, iudicibus nobilium et iuratis assessoribus ipsius nostre congregationis constraret evidenter; petentes nos cum instantia, ut iidem comes, iudices nobilium et iurati assessores qualem de premissis scirent, per nos requisiti faterentur veritatem. Cumque nos eosdem comitem et iudices nobilium ac iuratos assessores predicte congregationis nostre super premissis requisitos habuissemus, iidem ad fidem eorum Deo debitam, fidelitatemque domino nostro regi et suo sacro dyademati conservandam tacto dominice crucis ligno nobis prestitam una cum et concordi testificatione taliter affirmarunt, quod ipsi hoc scirent, quod in predicta civitate Bath ab antiquo tributum extitisset et existeret de presenti, hoc etiam scirent, quod tributarius de dicta Bath quibusdam temporibus homines mercatores et alios viatores, qui de dicta Solyumus in dictam Baka derelicto videlicet tributo in eadem Bath exigi consueta (!) transire consuevissent, spoliasset; sed, si de iure illud fecerit an ne, ignorarent. In cuius assertionis testimonium presentes litteras nostras patentes eisdem domino abbati et civibus de dicta Bath duximus concedendas. Datum octavo die congregationis nostre predicte in loco memorato, anno Domini millesimo trecentesimo octogesimo primo. [1381. jún. 25.]