Excellentissimo principi et domino suo gratioso, domino Lodovico, Dei gratia inclito regi Hungarie, Polonie, Dalmatie etc. capitulum ecclesie Iauriensis orationum in Christo suffragia continua devotarum. Vestra dignetur nosse serenitas, quod, cum iuxta continentiam litterarum magnifici viri comitis Nicolai de Zeech, iudicis curie vestre, comitatumque Posoniensem pro honore tenentis, formam adiudicationis eiusdem inter religiosum virum dominum fratrem Paulum, abbatem de Beel, ut actorem ab una et Stephanum, filium Petri, de Atya in causam attractum ex altera parte late exprimentium una cum Stephano, filio Andree, de Ayka homine vestre maiestatis Thomam, chori nostri clericum, hominem nostrum pro parte dicti domini abbatis, annotato Stephano, filio Petri, pro sua parte a nobis hominem non petente, ad ea, que in dictis litteris adiudicatoriis continerentur exequenda, pro testimonio fidedignum transmisissemus, tandem iidem vester et noster homines ad nos reversi nobis concorditer retulerunt, quod ipsi in octavis festi Beati Michaelis archangeli nunc preteritis [1381. okt. 6.] ad facies possessionis prefati domini abbatis Polyan vocate et cuiusdam terre per dictum Stephanum, filium Petri, Mihal appellate vicinis et conmetaneis earumdem universis legitime convocatis et ipsis, dictisque partibus ambabus personaliter inibi presentibus, memorato autem Stephano in causam attracto se de hiis, que per predictos vestrum et nostrum homines in processu adiudicatorio prenotato fierent, ac si ipse pro sua parte vestrum et nostrum homines similiter adduxisset, se contentari asserente, accessissent; et primo annotatam possessionem Polyan predicti domini abbatis per metas et cursus metales in privilegio domini Geyse regis per eundem dominum abbatem inibi in specie exhibito contentas et expressos iuxta demonstrationem ipsius domini abbatis taliter reambulassent, quod pretermissis propter non oportunitatem inicialibus et prioribus metis seu cursibus metalibus in dicto privilegio declaratis, in predictisque litteris adiudicatoriis seriatim transscriptis, in loco, qui Poklusberek seu Poklushaza per ambas partes pretactas ac etiam per alios quoslibet vicinos et conmetaneos nominatus fuisset et nominaretur, a duabus metis terreis evidentibus, quas dictus dominus abbas prelibate possessioni sue Polian ab oriente et possessioni Beche ab occidente, prescriptus vero Stephanus, filius Petri, non sic, sed sue possessioni Mihal ab oriente et possessioni Beche iam dicte ab occidente distinguere allegasset, incipiendo processissent in spatio conpetenti versus septemtrionem ad quendam rivilum per dictum dominum abbatem et per alios conprovinciales ac vicinos et conmetaneos Egrugh, per predictum vero in causam attractum Mihalpataka vocatum et nuncupari assertum, quem presignatus dominus abbas inter possessiones suas Polian predictam a meridie et Ganna ab aquilone, occidente autem nobilium de Perechke, antedictus vero Stepbanus, filius Petri, inter possessiones Ganna prenotatam ab aquilone et suam terram Mihal a meridie separare et distinguere asseruissent; exinde itaque per predictum Egreg (!) seu secundum extensionem eiusdem ad orientem procedendo bonum spatium et demum aliquantulum versus meridiem divertendo pervenissent ad puteum seu fontem antiquum, de quo aquam effluere conspexissent, ubi idem dominos abbas possessiones suas Polyan et Ganna predictas ac terram suam de Kereztur sub monte Manchheg vocato habitam angariariter separari retulisset et dum ob maioris iustitie evidentiam dominus abbas sepedictus ad ulteriores et finales metas suas secundum seriem preallegati privilegii ipsos vestrum et nostrum homines deducere voluisset, Stephanus, filius Petri, predictus se ad illas partes nullum ius habere respondens, amplius cum eisdem procedere recusasset; hiisque prehabitis pretitulatus Stephanus, filius Petri, inter metas et cursus metales per predictum dominum abbatem predemonstratos quandam particulam terre Myhal vocando et suam esse asserendo hoc modo reambulassent, quod incipiendo non longe a puteo seu fonte et rivulo prenotatis in margine feneti populorum dicti domini abbatis de Ganna secus quandam viam duas metas apparentes nomine metarum possessionis sue Mihal a meridie et occidente, dicteque possessionis Ganna a septemtrione distinctivarum ostendisset, quas prefatus dominus abbas ab olim per predecessores suos abbates inter predictas possessiones ipsorum Polyan et Ganna ordinates et pro distinctione conmissas fuisse allegasset, a quibus quidem metis idem Stephanus, filius Petri, versus occidentem in longo spatio per silvam hinc inde vacillando et girando et tandem ad aquilonem per magnum spatium reflectendo in quodam loco fenili quandam planitiem terre mete nullatenus consimilem pro meta inter suam Mihal et Beche possessiones distinguentem demonstrasset, ab inde vero non longe, quasi inter occidentem et aquilonem pergendo ad prememoratas duas metas in loco Pokloshaza vocato habitas, deinde ad prescriptum rivulum Egrugh et abhinc per pratum ad premissas duas metas iuxta fenetum populorum de Ganna predictum, a quibus ipse Stephanus suam demonstrationem incepisset, exeuntes, devenisset et ibidem suam ostensionem determinasset; cumque ipsi vester et noster homines terram in lite remanentem una cum aliis probis viris legitime estimare voluissent, predictus Stephanus, filius Petri, huiusmodi estimationem fieri minime acceptasset. Datum quinto die processus prenotati, anno Domini millesimo trecentesimo octogesimo primo. [1381. okt. 10.] ||
[Hátulján:] Domino regi pro domino Paulo abbate de Beel contra Stephanum filium Petri de Atya super possessionaria reambulatione et metarum ostensione et ceteris per regium et nostrum homines modo interius expresso in octavis festi Beati Michaelis archangeli factis ad octavam diem earundem rescriptionalis.