...||
Lodovicus, Dei gratia rex Hungarie, fidelibus suis religiosis viris domino Ladislao abbati et conventui monasterii Sancti Martini de Sacro Monte Panonie salutem et gratiam. Cum nos terram ipsius monasterii vestri Almas dictam pridem desertam et ipsi monasterio nulla vel valde pauca utilitatis comoda conferentem non modicis sumptibus et libertatum concessionibus mediantibus effici fecerimus populosam, condignam vero permutationem, quam pro eadem dicto monasterio dare intendebamus et volumus nondum adimplere potuerimus, nec adhuc possimus variis nostris negotiis legalibus prepediti, medio autem tempore idem monasterium frustrari nolimus fructuum dicte terre congrua reconpensa, fidelitatem vestram requirimus seriose per hec scripta omnino volentes, quatenus, donec pro eadem terra concambium vobis condecens facere valeamus, ipsam sub eo censu annuo, quo eam dilectus et fidelis magister Franciscus, phisicus noster hactenus a vobis tenuit et nunc tenet, nobis per litteras vestras ad id opportunas conmittere et consignare debeatis feudaliter conservandam ita videlicet, quod ex nunc incipiendo per sex annos successive venturos quolibet anno in festo Beati Georgii martyris una marca denariorum gravis ponderis monete pro tempore currentis, evolutis vero ipsis sex annis ex tunc et deinceps per singulos annos singule quatuor marce denariorum eiusdem ponderis et monete in dicto festo vobis apud predictum monasterium vestrum ex parte nostri pro prescripte terre conservatione integre persolvantur, tali federe interiecto, quod, si premissas sumpmas pecuniarias in aliquibus annis seu terminis persolvi vobis non faceremus debito suo modo, tunc penam duppli cuiuslibet sumpme non solute incurremus eo facto; si autem umquam per quatuor annos continuos obmitteretur predicta solutio censualis, ex tunc mox memoratam terram cum omnibus suis pertinentiis et iuribus ad vos revocandi et recipiendi vobis libera sit facultas; promittimus nichilominus, quod quamdiu sepedictam terram seu possessionem sub pacto conservabimus prenotato, de decimis iustis exinde vobis debitis faciemus per cultores eiusdem terre vobis et ecclesie vestre legittime responderi. Datum in Wyssegrad, secundo die festo Beatorum Petri et Pauli apostolorum, anno Domini millesimo trecentesimo sexagesimo septimo. [1367. jún. 30.]||
...