Nos capitulum ecclesie Wesprimiensis memorie conmendamus, quod religiosus vir dominus frater Iohannes, abbas monasterii de Beel, ad nostram veniens presentiam per modum prohibitionis et protestationis nobis exponens declaravit, ut, sicut ipse percepisset et etiam veraciter sciret, quedam domina, consors videlicet Petri, filii Stephani, de Beree et Valentinus, filius suus, pretendentes in possessione Kayar vocata, cuius non modica pars sua esset et ad dictum suum monasterium pertineret, ius habere et portionem, prout audivisset, cum auxilio magistri Stephani, filii condam Dyonisy wayvode, ut dicta domina et filius suus asseruissent, ipsorum protectoris, pridem ad ipsam possessionem Kayar nuncupatam veniendo in quadam particula terre prefatorum domini abbatis et sui monasterii nunc vacua in iam dicta Kayar existenti, in cuius dominio pacifice semper extitissent potentionaliter quasdam domunculas construxissent et edificari procurassent, volentes prescripti domina et filius suus per hoc dictam particulam terre ipsorum domini abbatis et sui monasterii in grande preiudicium eorum pro se vendicando appropriare; unde ipse prelibatos dominam et Valentinum filium ac alios quosvis a premissarum domuncularum in superficie memorate particule terre eorum vacue constructione et edificatione, eandemque terre particulam sibi ipsis usuicaptione, pro se appropriatione vel alio quovis quesito colore se in ipsam ingessione in preiudicium ipsorum factis vel fiendis prohiberet, imo prohibuit contradicendo et contradixit inhibendo coram nobis roboramine presentium mediante. Datum in festo Beati Georgii martiris, anno Domini Mo CCCo nonagesimo sexto. [1396. ápr. 24.]