...||
Sigismundus, Dei gratia rex Hungarie, Dalmatie, Croatie, etc., marchioque Brandenburgensis etc., fidelibus suis universis nobilibus in comitatu Symigiensi possessiones ubicunque habentibus presentium continentiam tenentibus salutem et gratiam. Scitote, nos veridico viri religiosi fratris Stephani, abbatis monasterii Sancti Martini de Sacro Monte Pannonie ex relatu percepisse, quomodo vos contra statuta sanctorum regum beate reminiscentie predecessorum nostrorum vigorosis eorum privilegiis antefato monasterio ab olym salubriter concessis limpide fulcita, solutionemque verarum decimarum de cunctis possessionibus vestris annotato monasterio et eius abbati provenire debentium et clare concernentia, ipsas veras decimas vinorum scilicet, bladorum, agellorum, edorum et apum in predictis possessionibus vestris singulis annis ex telito (!) opitulamine procreandorum ex quadam abusiva consuetudine, pleraque allodia, oreg (!) et curias in dictis possessionibus vestris existentia et habitas pretaxatis vinis, bladis, agnellis, apibus et edis copiose referta et locupletatas pro vestris usu et esu, sicuti salutis anime vestre immemores prorsus et obliti annuatim iugiter vi et illegitime retinentes annotatis fratri Stephano abbati et monasterio suo, eiusque decimatoribus plenarie extradare et amministrari facere recusaretis potentionaliter resistentes in hac parte in ipsorum monasterii ac abbatis et conventus eiusdem dampnum valde magnum. Unde, cum nos ipsum monasterium et eiusdem abbatem ac conventum antefatos in universis eorum iuribus, presertim solutionem decimarum prescriptarum continentibus, in eisdem privilegiis sanctorum regum, quorum imitatores et zelatores totis nisibus esse anhelamus, latius explicatis indempnes et illesos velimus facere conservare pariter et tueri, pretaxata vestra abusiva consuetudine, cuius pestifero ritu ipsas decimas pro vobis uti prefertur, hactenus illegittime vendicare veriti non fuistis postergata et sopita in hac parte, ideo fidelitati vestre firmissime precipiendo mandamus, quatenus a modo in antea pretaxatas veras et iustas decimas, signanter vinorum, bladorum, agnellorum, edorum et apum in et de cunctis possessionibus vestris iuxta contenta litterarum prefatorum sanctorum regum plenarie, absque omni retentione et retardatione solutionis decimarum earundem annotatis fratri Stephano abbati et conventui monasterii antefati, suisque decimatoribus solitis temporibus dicare pacifice sinatis, factaque dicatione earundem persolvere et amministrare debeatis pleno cum effectu recusa occasione et mora quibuslibet postergatis in hac parte. Qui si feceritis, bene quidem, alioquin volumus et presentium serie conventui ecclesie Symigiensis edicimus, quatenus tociens, quociens necesse et oportunum fuerit, per ipsumque fratrem Stephanum abbatem fuerint requisiti, ipsorum transmittere hominem teneantur pro testimonio fide dignum, quo presente Franciscus, filius Douse, de Orozy sive Ladislaus, filius Laurentii, de eadem seu Stephanus de Gugh aut Georgius, filius Mauritii, de Kaua sive Benedictus de Lykyuasan seu Paulus Rufus de Kysrauasd an Iohannes, filius Emerici, de Azzonfalua seu Franciscus de Dyene vel Petrus de Bathyan, aliis absentibus homo noster prefatos tales nobiles comitatus Symigiensis antefati, qui pretaxatas decimas ipso previo modo et sinistro usu pro se ipsis vi retinere et vendicare maluerint evocet contra fratrem Stephanum abbatem et conventum antefatos in presentiam regni nostri palatini ad terminum conpetentem rationem de premissis personaliter et non per procuratorem sine crastinatione reddituros efficacem. Et tandem seriem totius facti cum nominibus evocatorum ac termino assignato eidem palatino, quociens oportunum fuerit, idem conventus rescribere teneatur effective et aliud, sicuti nostri regii edicti prevaricatores effici formidatis, facere non ausuri in premissis. Datum Bude in festo Beati Barnabe apostoli, anno Domini millesimo trecentesimo nonagesimo sexto. [1396. jún. 11.]||
...