...||
Sigismundus, Dei gratia rex Hungarie, Dalmatie, Croatie etc., marchioque Brandenburgensis etc., fideli suo reverendo in Christo patri domino Demetrio, episcopo ecclesie Wesprimiensi, salutem et gratiam. Dicitur nobis in personis fidelium nostrorum religiosi viri domini fratris Stephani abbatis et conventus monasterii Sancti Martini Sacri Montis Pannonie, quod, licet vos iuxta tenorem bulle olym Innocentii pape tertii per censuram ecclesiasticam et auctoritate vestra dyocesana universos et singulos dyocesanos vestros in districtu Simigiensi constitutos et commorantes ad solutionem decimarum ex parte eorundem ipsi monasterio et per consequens eidem abbati et conventu proveniendarum compellere teneremini et astringere, tamen vos spreta dispositione dicti domini pape nullam habuissetis, nec haberretis (!) ad premissa diligentiam, nec compellendo dictos vestros dyocesanos ad reddendas ex parte eorum debitas eidem monasterio decimas, in grande preiudicium, dampnum et detrimentum monasterii supradicti. Unde, cum nos velimus ipsum monasterium, cuius sumus patroni, sicut ex suscepti regiminis tenemur officio, in suis iuribus undique defensare et illibatum conservare, fidelitati igitur vestre precipiendo mandamus, quatenus quandocunque et quotienscunque necessarium et oportunum fuerit, prefatos vestros dyocesanos sine deffectu ad solvendas prefatas dicto monasterio decimas, prout iuxta apostolicam dispositionem tenemini, per ecclesiasticam censuram seu dyocesana vestra auctoritate compellere efficaciter curetis et debeatis et aliud non facturi. Datum Tyrnavie, in festo Beati Iacobi apostoli, anno Domini millesimo trecentesimo nonagesimo septimo. [1397. júl. 25.]||
...