(N)os Detricus Bubek de Pelseuch, regni Hungarie palatinus, memorie commendantes tenore presentium significamus, quibus expedit, universis, quod domino Leustachio de Ilsua, pridem similiter palatino tricesimo secundo die octavum festi Beati Georgii martiris in anno Domini millesimo trecentesimo nonagesimo sexto preteritarum [1396. jún. 1.] una cum regni nobilibus in sede sua iudiciaria sedente Francisscus (!) Was pro domino Stephano, abbate ecclesie Sancti Martini Sacri Montis Panonie, cum. procuratoriis litteris eiusdem ad ipsius domini palatini veniendo presentiam, quasdam litteras condam comitis Emerici, similiter Bubek, fratris nostri karissimi bone memorie, iudicis curie regie, proclamatorias, capitulo ecclesie Iawriensi directas eidem domino palatino presentasset declarantes, quod Nicolaus dictus Fodor pro domino Ladislao, abbate ecclesie Sancti Martini Sacri Montis Panonie, cum procuratoriis litteris eiusdem iuxta continentiam litterarum dicti capituli ecclesie Iawriensis citatoriarum et recaptivatoriarum in octavis festi Beati Georgii martiris in anno Domini millesimo trecentesimo septuagesimo primo preteritis [1371. máj. 1.] in figura iudicii comitis Nicolai de Zeech, similiter honorem iudicatus curie regie tenentis comparendo, contra Frank, filium condam Konye bani, easdem litteras domino nostro regi ad suum regium litteratorium mandatum rescriptas, asserens actionem eiusdem domini Ladislai abbatis litteris contineri in eisdem, eidem comiti Nicolao presentasset declarantes, quod, cum idem dominus abbas acceptis Ladislao, filio Valentini de Gywiek regio et Gallo clerico dicti capituli ecclesie Iawriensis hominibus feria tertia proxima post dominicam Letare tunc preteritam [1371. márc. 18.] ad villam Zely magistri Frank, filii condam Konye bani, in comitatu Posoniensi habitam accessisset, ibique decimam et tertiam partes tributi inibi exigi consueti dicte ecclesie Sancti Martini Sacri Montis Panonie recaptivare et statui facere voluisset, Ladislaus, familiaris ipsius Frank, ipsis recaptivationi et statutione in persona dicti domini sui contradictionis velamine obviasset, quem quidem magistrum Frank ibidem cum litteralibus suis instrumentis super ipso tributo confectis contra predictum dominum abbatem ad octavas festi Beati Georgii martiris tunc venturas [1371. máj. 1.] iidem regii et dicti capituli Iawriensi homines ad regie maiestatis presentiam citavissent.||
Quibus quidem litteris exhibitis annotato procuratore ipsius domini abbatis rationem premisse contradictorie inhibitionis per eundem Frank asignare postulante, magister Thomas litteratus pro ipso magistro Frank cum procuratoriis litteris capituli ecclesie Agriensis coram dicto comite Nicolao adherendo respondisset eo modo, quod in persona eiusdem magistri Frank statutioni tributarie premisse pro eo contradictio fuisset facta, quia predictum tributum ipso magistro Frank instrumentali vigore pertineret, que non ad tunc, sed in termino ulteriori per eundem comitem Nicolaum sibi dando coram ipso exhibere promptus esset et paratus. Unde idem comes Nicolaus perceptis premissis una cum regni nobilibus secum in iudicio sedentibus commisisset eo modo, quod idem Frank universa sua litteralia instrumenta, si que facto in premisso haberet confecta, contra prefatum dominum abbatem in octavis festi Beati Mychaelis archangeli tunc venturis [1371. okt. 6.] coram ipso exhibere teneretur, quibus visis iudicium et iustitiam facere valeret inter partes in premissis.||
Et cum ab eisdem octavis festi Beati Mychaelis archangeli premissorum instrumentorum exhibitio partes inter easdem, interim ipso comite Nicolao de ipso honore iudicatus curie regie in banatum regni Sclauonie translato, ipsoque honore iudicatus curie regie per regiam serenitatem comiti Iacobo de Sepus dato, iuxta series et continentias litterarum eiusdem comitis Iacobi prorogatoriarum diversimode ventilando ad octavas festi Beati Georgii martiris tunc venturas deventa extitisset, tandem ipsis octavis Beati Georgii martiris [1375. máj. 1.] instantibus annotatus magister Frank per dominum Nicolaum priorem, qui pro dicto domino tunc abbate ecclesie Sancti Martini Sacri Montis Panonie, in quem presens causa mortuo predicto domino Ladislao priore abbate extitisset redundata, in presentia eiusdem comitis Iacobi legitimis diebus earundem octavarum expectatus non venisset, nec misisset, se mediantibus litteris eiusdem comitis Iacobi iudicialibus in iudicio aggravari permittendo, postulans prefatus procurator ipsius domini abbatis eidem ex parte dicti magistri Frank per ipsum comitem Iacobum iudicium et iustitiam inpartiri (!) in premissis; cumque idem Iacobus comes memoratum magistrum Frank, filium condam Konye bani, premissa sua instrumenta exhibiturum ac de iudicio trium marcarum sibi et parti adverse satisfacturum per regium et dicti capituli Iawriensis homines contra ipsum dominum abbatem ad octavas festi Beati Mychaelis archangeli in anno Domini Mo CCCo septuagesimo sexto preteritas [1376. okt. 6.] regiam in presentiam evocare fecisset, ab eisdemque octavis festi Beati Mychaelis archangeli causa partium premissa partes inter easdem primo iuxta continentias litterarum eiusdem comitis Iacobi prorogatoriarum diversimode ventilando ad octavas festi Beati Mychaelis archangeli in anno Domini Mo CCCo octuagesimo preteritas [1380. okt. 6.] simul cum dictis iudiciis, postremoque, ipso honore iudicatus curie regie per regiam clementiam iterum dicto comiti Nicolao dato, secundum series litterarum eiusdem prorogatoriarum diversimode ventilando ad octavas festi Beati Georgii martiris in anno Domini Mo CCCo octuagesimo tertio preteritas [1383. máj. 1.] simul cum dictis iudiciis sex marcarum duplatarum sibi et una marca parti adverse persolvendis prorogative devenisset.||
Tandem ipsis octavis instantibus prefatus magister Frank, filius condam Konye bani, per Ladislaum, filium Valentini, legitimum procuratorem domini Stephani moderni abbatis, in persona eiusdem congruis diebus ipsarum octavarum coram dicto comite Nicolao exspectatus eiusdem in presentiam non venisset, nec misisset, nec dicta iudicia sibi et parti adverse persolvere debens persolvisset se pro sua non venientia in iudicio consueto et pro non solutione dictorum iudiciorum mediantibus suis litteris iudicialibus in duplo eorundem convinci permittendo, postulans prefatus procurator dicti domini abbatis eidem in premissis ex parte dicti magistri Frank per ipsum comitem Nicolaum iuris equitatem impartiri, unde, quia forma iuris eundem magistrum Frank adhuc ad premissa in tribus foris comprovincialibus proclamandum fore dictasset, pro eo, cum ipse comes Nicolaus memoratum magistrum Frank premissa litteralia instrumenta exhibiturum ac de iudiciis viginti quatuor marcarum sibi et duarum marcarum parti adverse, necnon iudicio trium marcarum similiter sibi et parti adverse satisfacturum per regium et dicti capituli Iawriensis homines contra annotatum dominum Stephanum abbatem in tribus foris conprovincialibus ad octavas festi Beati Iacobi apostoli tunc venturas [1383. aug. 1.] regiam in presentiam publice et manifeste proclamari fecisset.||
Tandem ad easdem octavas festi Beati Iacobi apostoli idem Frank per annotatum procuratorem dicti domini abbatis in persona eiusdem congruis diebus ipsarum octavarum coram ipso comite Nicolao expectatus eiusdem in presentiam non venisset, nec misisset, nec persolvisset iudicia prenotata, se pro sua non venientia in iudicio consueto et pro non solutione dictorum iudiciorum in duplo eorundem mediantibus litteris eiusdem iudicialibus convinci permittendo, de hinc prefatus procurator ipsius domini abbatis volens prefatam tertiam partem ipsius tributi in dicta Zely exigi consueti ipso domino abbati pertinere debere declarare, quasdam litteras domini Bele, olym regis Hungarie anno Domini Mo CCo sexagesimo secundo, [1262.] regni autem sui anno vigesimo octavo emanatas, tenorem quarundam litterarum alterius Bele, similiter regis Hungarie, anno dominice incarnationis Mo Co tricesimo septimo [1137.] emanatarum transsumptive et confirmative in se habentes ipsi comiti Nicolao de Zeech presentasset, in quibus inter alia hec clausula reperta fuisset:||
Contuli ecclesie Sancti Martini tertiam et decimam partes tributi de Fok et totius comitatus Symigiensis et etiam tertiam partem tributi totius comitatus Posoniensis tam in magnis, quam in parvis et in omni loco ubicunque tributum pro tunc exigeretur vel in futurum ex aliqua institutione exigi contingeret.||
Quibus quidem litteris exhibitis prefatus procurator ipsius domini abbatis eidem in premissis ex parte prescripti magistri Frank per eundem comitem Nicolaum iuris equitatem petivisset inpartiri; verum, quia prefatus dominus Ladislaus abbas acceptis regio et annotati capituli Iawriensis hominibus ad faciem predicte possessionis Zely vocate, ipsius magistri Frank vicinis et commetaneis eiusdem universis illuc legitime convocatis accedendo tertiam partem tributi in eadem Zely exigi consueti legitime recaptivando sibi per eosdem regium et dicti capituli homines statui facere voluisset, statutionique eiusdem in persona ipsius magistri Frank contradictio facta extitisse et ob ipsam contradictionem idem magister Frank regiam in presentiam citatus in facto eiusdem tributi, legitimus procurator eiusdem instrumenta habere allegando eadem exhibere assumpsisse et eadem exhibere recusasse, tandemque ad exhibenda ipsa instrumenta primo evocatus et tandem in tribus foris comprovincialibus regiam in presentiam legitime proclamatus ad nullum eorundem terminorum sibi iuridice assignatorum venire vel mittere curasse, sed se a facie iuris et iustitie absentando onere iudiciali opprimi permisse (!), prefatusque dominus Bela rex dictam tertiam partem totius tributi comitatus Posoniensis exigi consueti et aliqua institutione in futurum exigendi eidem ecclesie Sancti Martini contulisse ex premissis agnitum fuisset, consuetudinaria vero regni lege requirente quicunque in facto iurium possessionariorum aliquorum per quempiam recaptivatorum contradictionem fecerint et idem ob ipsam contradictionem citatus in facto eorundem instrumenta habere allegando eadem asumpserit exhibere et tandem exhibere renuerit et ad exhibenda eadem primo evocatus et tandem tribus foris comprovincialibus regiam in presentiam proclamatus ad nullum eorundem terminorum sibi iuridice assignatorum in presentiam sui iudicis ordinarii venire vel mittere curaverit, sed se a facie iuris et iustitie penitus absentando mole iudiciali opprimi permiserit, tales statutioni huiusmodi iuris possessionarii vel aliquarum aliarum proprietatum contradictores non valent obviare, sed requisitor talium iurium possessionariorum contradictione dictorum inhibitorum et aliorum quorumlibet non obstante in dominium eorundem statui debent atque introduci, pro eo ipse comes Nicolaus amicitiam dicti capituli Iauriensis litteratorie petivisset diligenter, quatenus ipsorum mitterent hominem pro testimonio fide dignum, quo presente homo regius infradeclarandus in quindenis diei Medii Quatragesime tunc venturis [1384. márc. 30.] ad faciem prefate possessionis Zely vicinis et commetaneis eiusdem universis inibi legitime convocatis accedendo, tertiam partem predicti tributi in dicta possessione exigi consueti prefato domino Stephano, abbati ecclesie Sancti Martini Sacri Montis Panonie, statueret et committeret perpetuo possidendam, tenendam et habendam contradictione prefati magistri Frank et aliorum quorumlibet non obstante; et post hec ipsius tributarie statutionis seriem ad octavas festi Beati Georgii martiris tunc venturas [1384. máj. 1.] domino nostro regi fideliter rescriberet capitulum Iawriense antedictum.||
Tandem ipsis octavis instantibus Petrus prepositus pro ipso domino Stephano abbate cum procuratoriis litteris eiusdem ad eiusdem comitis Nicolai veniendo presentiam, litteras dicti capituli super premissis domine nostre regine rescriptionales eidem comiti Nicolao presentasset declarantes, quod, cum ipsum capitulum receptis ipsis litteris annotati comitis Nicolai statutoriis iuxta earundem continentiam una cum Emerico, filio Leukus, de Pethend, homine regio, dominum Ladislaum, chori ecclesie ipsorum presbiterum, ipsorum hominem ad premissam tributariam statutionem faciendam pro ipsorum testimonio duxisset transmittendum, demum iidem ad ipsum capitulum reversi eidem concorditer retulissent, ut ipsi in dictis quindenis diei Medi Quatragesime ad faciem prefate possessionis Zely, in comitatu Posoniensi existentis, vicinis et commetaneis eiusdem convocatis accessissent, ibique tertiam partem tributi in eadem possessione exigi consueti prenominato domino Stephano, abbati ecclesie Sancti Martini Sacri Montis Panonie, statuissent perpetuo possidendam contradictione ipsius magistri Frank et aliorum quorumlibet non obstante, factaque ipsa statutione ipsius tertie partis tributi Iohannes de Wba, officialis et tributarius ipsius ville Zely, serviensque dicti magistri Frank, in persona eiusdem domini sui incitatis et convocatis potioribus villanis manibus armatis et potentiariis super ipsos irruendo a statutione eiusdem tributarie portionis prohibuisset, ymo eandem tributariam statutionem fieri non permisisset ipsos verbis vituperosis pertractando, neque etiam ipsis in ipsa possessione licentiam permanendi habere permisissent; quibus quidem litteris exhibitis prefatus procurator dicti domini abbatis eidem in premissis per eundem comitem Nicolaum iuris equitatem petivisset inpartiri.||
Quibus perceptis, quia prefatus Iohannes, famulus ipsius magistri Frank, in persona eiusdem domini sui una cum aliis villanis de dicta villa Zely super dictos regium et annotati capituli homines insurgendo premissam tributariam statutionem fieri non premisissent, ymo eosdem regium et dicti capituli homines turpiter pertractasse ex premissis repertum fuisset et ex eo ipsi comiti Nicolao et regni nobilibus cum ipso adiudicantibus premissa tertia pars dicti tributi in dicta Zely habita eidem domino abbati restatui (!) ac idem magister Frank pro premissis potentiariis actibus dicti sui familiaris evocandus fore visus fuisset, pro eo ipse comes Nicolaus amicitiam dicti capituli litteratorie petivissent diligenter, quatenus ipsorum mitterent hominem pro testimonio fide dignum, quo presente homo regius in octavis festi Beati Iacobi apostoli tunc venturis [1384. aug. 1.] ad faciem predicte possessionis Zely vocate vicinis et commetaneis eiusdem legitime inibi convocatis accedendo tertiam partem ipsius tributi in dicta possessione exigi consueti predicto domino Stephano, abbati Sancti Martini, statueret et committeret perpetuo possidendam contradictione prefati magistri Frank et aliorum quorumlibet non obstante, habitaque ipsa statutione prefatum magistrum Frank rationem de premissis factis potentiariis redditurum contra annotatum dominum abbatem ad easdem octavas reginalem evocaret in presentiam; et post hec ipsius possessionarie statutionis seriem cum nomine evocati ad easdem octavas domine regine fideliter rescriberet capitulum prenotatum.||
Tandem, quia dictus magister Frank per dictum fratrem Petrum prepositum in persona dicti domini abbatis congruis diebus ipsarum octavarum coram ipso comite Nicolao expectatus eiusdem in presentiam non venisset, nec misisset et ob hoc idem ad premissa vice secundaria evocandus fore fuisset visus, pro eo, cum idem comes Nicolaus per reginalem et dicti capituli Iawriensis homines primo ad octavas festi Epiphaniarum Domini tunc venturas, [1385. jan. 13.] vice secundaria et vice trinaria ad octavas Medii Quatragesime tunc sequentes [1385. márc. 15.] annotatum magistrum Frank contra memoratum dominum Stephanum abbatem reginalem in presentiam evocari fecisset, a quibus quidem octavis diei Medii Quatragesime dum causa partium prescripta partes inter easdem iuxta continentias litterarum diversorum comitum iudicum curie regie prorogatoriarum ventilando ultimatim ad octavas festi Epiphaniarum Domini in anno eiusdem Mmo CCCmo nonagesimo preteritas [1390. jan. 13.] cum iudiciis nonaginta sex marcarum iudici ac sex marcarum parti adverse persolvendis prorogative devenisset, tandem octavas ad easdem prefatus magister Frank per Stephanum Magnum, procuratorem dicti domini abbatis, congruis diebus octavarum earundem coram ipso comite Emerico expectatus eiusdem in presentiam non venisset, nec misisset, nec persolvisset iudicia prenotata, se pro sua non venientia in iudicio consueto et pro non solutione dictorum iudiciorum in duplo eorundem mediantibus eiusdem comitis Emerici iudicialibus aggravari permittendo, postulans prefatas procurator dicti domini abbatis eidem ex parte memorati magistri Frank per ipsum comitem Emericum in premissis iuris equitatem inpartiri: unde, quia consuetudo regni eundem magistrum Frank ad premissa in tribus foris comprovincialibus proclamandum fore dictasset, pro eo idem comes Emericus amicitiam prelibati capituli Iauriensis litteratorie diligenter petivisset, quatenus ipsorum mitterent hominem pro testimonio fide dignum, quo presente homo regius prefatum magistrum Frank in premissis perhemptorie responsurum, rationemque efficacem redditurum ac de dictis iudiciis centum et nonaginta marcarum sibi, septem vero marcarum parti adverse satis facturum contra annotatum dominum Stephanum abbatem in tribus foris comprovincialibus publice et manifeste ad quindenas diei Medii Quatragesime tunc venturas [1390. márc. 23.] regiam in presentiam faceret proclamari insinuando ibidem, ut, si veniret et ad premissa responderet ac de dictis iudiciis satisfaceret, bene quidem, alioquin non obstante ipsius absentia et rebellione finem debitum faceret causa in premissa, prout dictaret ordo iuris; et post hec ipsius trineforensis proclamationis seriem cum nomine proclamati ad easdem quindenas domino nostro regi fideliter rescriberet capitulum Iawriense prenotatum.||
Quibus quidem litteris exhibitis prefatus procurator dicti domini abbatis allegasset eo modo, quod idem dominus Stephanus abbas quibusdam suis negotiis prepeditus eundem magistrum Frank ad predictum terminum contra se proclamari facere nequivisset, unde, si iuri consonaret et equitati videretur, ex tunc ipse dominus abbas eundem magistrum Frank contra se legitime facere vellet proclamari; et quia ipsa allegatio iuxta visa fuisset, pro eo, cum idem dominus Leustachius palatinus per suum et capituli Posoniensis homines memoratum magistrum Frank ad premissa contra annotatum dominum Stephanum abbatem in tribus foris comprovincialibus publice ac manifeste ad octavas festi Beati Iacobi apostoli tunc venturas [1390. aug. 1.] proclamari fecisset, ab eisdemque octavis festi Beati Iacobi apostoli ipsa causa partes inter easdem primo secundum series litterarum eiusdem domini Leustachii palatini et demum ipso honore palatinatus per regiam clementiam nobis dato iuxta continentiam litterarum nostrarum prorogatoriarum ventilando ad octavas festi Beati Mychaelis archangeli proxime preteritas [1397. okt. 6.] simul cum dictis iudiciis septem marcarum parti adverse et iudicio trium marcarum nobis et similiter parti adverse per ipsum magistrum Frank persolvendis prorogative devenisset, ipsis siquidem octavis instantibus dominus frater Petrus prepositus pro predicto domino Stephano abbate cum procuratoriis litteris eiusdem presente Benedicto litterato pro ipso domino Frank, nunc iudice curie regie, cum procuratoriis litteris eiusdem coram nobis adherente in nostram veniendo presentiam eidem domino abbati ex parte memorati domini Frank per nos in premissis iuris ecquitatem petierat inpartiri.||
Quo audito idem Benedictus litteratus, procurator dicti domini Frank, responderat ex adverso, quod idem dominus Frank prefatum dominum abbatem de dominio dicte tertie partis prescripti tributi in dicta Zely exigi consueti excludi non fecisset.||
Hiis auditis et perceptis nobis in facto facte non admissionis dicte statutionis tributarie inter partes prenotatas aliud iudicium facientibus, quia ipsa tertia pars tributi predicti in dicta possessione Zely exigi consueti memorato domino abbati restitui debere nobis et regni nobilibus nobiscum in iudicio existentibus visa fuerat, pro eo amicitiam dicti capituli Posoniensis litteratorie petieramus diligenter, quatenus eorum mitterent hominem pro testimonio fide dignum, quo presente homo noster infradeclarandus ad faciem dicte possessionis Zely vocate vicinis et commetaneis eiusdem universis illic legitime convocatis et presentibus accedendo ipsam tertiam (partem) dicti tributi ibidem exigi consueti predicto domino Stephano abbati et ecclesie sue premisso iure sibi incumbenti statueret perpetuo possidendam contradictione prefati domini Frank et aliorum quorumlibet non obstante, et post hec ipsius tributarie statutionis seriem ad octavas festi Epiphaniarum Domini tunc venturas [1398. jan. 13.] nobis amicabiliter rescriberet capitulum Posoniense prenotatum. Tandem ipsis octavis festi Epiphaniarum Domini instantibus religiosus vir dominus frater Petrus prepositus pro ipso domino fratre Stephano abbate cum procuratoriis litteris eiusdem in nostram veniendo presentiam litteras memorati capituli Posoniensis super premissis rescriptionales nobis presentavit habentes nunc tenorem:||
Magnifico viro domino Detrico Bubek de Pelseuch, regni Hungarie palatino, amico eorum capitulum ecclesie Posoniensis sincere amicitie et honoris incrementum. Noverit vestra magnificentia litteras vestras adiudicatorias pro religioso viro domino fratre Stephano, abbate monasterii Sancti Martini Sacri Montis Panonie, emanatas nobis directas debita cum reverentia recepisse et iuxta continentiam earundem una cum Benedicto, filio Dominici, de Vzur, homine vestro in dictis litteris vestris inter alios nominatim conscripto discretum virum dominum Paulum, prebendarium dicte ecclesie nostre, ad omnia ea, que in dictis litteris vestris continentur, suo modo peragenda nostro pro testimonio transmisisse fide dignum. Qui postmodum ad nos reversi nobis concorditer retulerunt, quod idem homo vester presente eodem nostro testimonio feria quarta proxima ante festum Beate Lucie virginis et martiris nunc proxime preteritum [1397. dec. 12.] ad faciem possessionis Zely vocate vicinis et commetaneis suis universis illic legitime convocatis et presentibus accedendo tertiam partem tributi predicti domini Stephani abbatis in dicta possessione Zely exigi consueti predicto domino Stephano abbati et ecclesie sue iure sibi attinenti perpetuo possidendam statuisset et commisisset contradictione magistri Frank de Zechen et aliorum quorumlibet non obstante. Datum octavo die statutionis antedicte, anno Domini Mmo CCCmo nongesimo (!) septimo. [1397. dec. 19.]||
Quibus quidem litteris ipsius capituli Posoniensis rescriptionalibus presentatis, quia ex serie earundem prefati noster et eiusdem capituli Posoniensis homines termino in prefixo ad faciem prescripte possessionis Zely vocate presentibus vicinis et commetaneis eiusdem inibi legitime convocatis et presentibus accedentes prescriptam tertiam partem dicti tributi in eadem Zely exigi consueti memorato domino Stephano abbati et ecclesie sue predicte iure sibi attinenti iuxta nostram iudiciariam commissionem prenotatam perpetuo possidendam statuisse et commisisse agnosscebantur, pro eo nobilium regni quesito et assumpto consilio prescriptam tertiam partem dicti tributi in eadem Zely exigi consueti cum cunctis suis utilitatibus et pertinentiis quibuslibet memorato domino Stephano abbati et sue ecclesie statutam relinquimus et committimus eisdem eo iure, quo eis ex premissis dinosscitur pertinere in perpetuum possidere, tenere pariter et habere, salvo iure alieno, auctoritate nostra iudiciaria mediante. In cuius rei memoriam, firmitatemque perpetuam presentes litteras nostras privilegiales pendentis autentici sigilli nostri munimine roboratas eidem domino Stephano abbati duximus concedendas. Datum in Vissegrad, vigesimo octavo die octavarum predictarum festi Epiphaniarum Domini, anno eiusdem millesimo trecentesimo nonagesimo octavo. [1398. febr. 9.]