Amicis suis reverendis, conventui ecclesie Zoboriensis Detricus Bubek de Pelseuch, regni Hungarie palatinus, amicitiam paratam cum honore. Noveritis, quod nobis vigesimo octavo die octavarum festi Beati Georgii martiris in anno Domini millesimo trecentesimo nonagesimo septimo preteritarum [1397. máj. 28.] una cum regni nobilibus pro faciendo moderativo iudicio causantibus in sede nostra iudiciaria sedentibus Franciscus dictus Was pro religioso viro domino fratre Stephano, abbate ecclesie Sancti Martini Sacri Montis Pannonie cum procuratoriis litteris conventus loci eiusdem ad nostram veniendo presentiam quasdam tres litteras, unam comitis Nicolai de Zeech, condam iudicis curie regie, evocatoriam capitulo ecclesie Iauriensis directam et secundam eiusdem capituli Iauriensis domine Marie, pridem regine Hungarie, exinde rescriptionalem et tertiam comitis Iohannis de Kapla, condam similiter iudicis curie, iudicialem, necnon quedam paria litterarum eorundem Nicolai et Iohannis comitum, iudicum curie regie, prorogationalia tunc in diversis annis et terminis emanatas et confecta nobis presentarat declarantes, quod prefato domino Nicolao de Zeech in octavis festi Assumptionis Beate Virginis in anno Domini millesimo trecentesimo octoagesimo secundo preteritis [1382. aug. 22.] una cum regni nobilibus secum in iudicio presentibus, causalesque processus quorumlibet coram ipso litigantium iusto iuris tramite discutiente dominus frater Petrus prepositus pro religioso viro domino fratre Stephano, abbate Sancti Martini Sacri Montis Panonie, cum procuratoriis litteris eiusdem ad ipsius comitis Nicolai veniendo presentiam contra Gothhardum, filium Petri, de Pathwarych quasdam quatuor litteras, unam prescripti capituli Iauriensis, aliam comitis Iacobi, olim iudicis curie regie, necnon duas memorati comitis Nicolai de Zeech ipsi comiti Nicolao presentasset, quarum prima, scilicet ipsius capituli Iauriensis sexto die ferie quarte proxime post octavas Passce Domini in anno eiusdem millesimo trecentesimo sexagesimo secundo [1362. máj. 2.] exorta declarasset, quod ipsum capitulum receptis litteris domini regis annualibus pro eodem domino abbate gratiose concessis, una cum Andrea, filio Dominici de Saly, homine regio, Gallum, chori ipsorum clericum pro ipsorum testimonio duxissent destinandum, qui demum ad ipsum capitulum reversi eidem concorditer retulissent, quod ipsi in ipsa feria quarta proxima post octavas festi Passce Domini [1362. ápr. 27.] ad faciem possessionis Pathwarych vocate vicinis et conmetaneis eiusdem inibi legittime convocatis accessissent et cum ipsam possessionem nomine iuris dicti domini abbatis recaptivare et sibi statui facere voluissent, tunc in persona dicti Gothhardi contradictio facta extitisset, quem die et loco in predictis contra dominum Ladislaum abbatem ad octavas festi Beati Georgii martiris tunc venturas [1362. máj. 1.] citavissent; secunda autem ipsarum litterarum scilicet ipsius comitis Iacobi hic in Wissegrad, octavo die octavarum festi Beati Michaelis archangeli in anno Domini millesimo trecentesimo septuagesimo octavo [1378. okt. 13.] confecta expressisset, quod instrumentalem exhibitionem, quam Gothhardus, filius Petri dicti de Zala contra dominum Ladislaum, abbatem Sancti Martini, iuxta continentiam litterarum eiusdem comitis Iacobi prorogatoriarum super facto possessionis Pathwarych vocate in dictis octavis festi Beati Michaelis archangeli cum iudicio trium marcarum facere, in quo etiam termino aliud iudicium trium marcarum idem Gothhardus iudici et parti adverse persolvere debuisset coram ipso, qui quidem Gothhardus litteras domini regis maiori suo sigillo consignatas, hunc tenorem continentes:||
Nos Lodovicus, Dei gratia rex Hungarie, Polonie, Dalmatie etc., significamus tenore presentium, quibus expedit universis, quod, quia Gothhardus, filius Petri dicti de Zala, fidelis noster, quandam curiam suam hereditariam in civitate nostra Thapolcha vocata habitam cum omnibus edificiis, necnon septem sua molendina in fluvio Nitra sita, fruges molentia et alia duo molendina in eodem fluvio habita et existentia, pannos volventia seu texentia, olym pro meritoriis servitiis prenotati Petri, patris sui, per nostram maiestatem vigore aliarum nostrarum litterarum exinde confectarum iure perhempnali eidem Petro donata et collata, nostreque maiestati pro nunc satis utilia et comodosa nostris beneplacitis se conformare cupiens nostre sponte et liberaliter obtulit maiestati, ideo nos ipsius Gothhardi gratuitam et virtuosam nostre in hac parte exhibitam conplacentiam regio favore benevolenter pensantes, in concambium prenotate curie et novem molendinorum per iam dietum Gothhardum modo premisso nobis oblatorum de nostre regie liberalitatis munifica clementia et gratia speciali ipsum Gothhardum et suos heredes ac successores universos in dominio possessionis Pathwarych nomine, in comitatu Nitriensi existentis, olym per condam illustrem principem dominum Karulum, regem Hungarie, genitorem nostrum karissimum pie memorie, vita sibi comite existente, demumque eodem nutu divino de medio sublato nobis regimen et solium (!) ipsius iure et ordine transscendentibus semper pacifice et quiete per nos, ut fertur, conservate et absque omni litigionario processu habite et possesse, per nostramque celsitudinem pretacto Petro dicto de Zala pro multimodis et gratuitis obsequiis ipso vivente nobis exhibitis et inpensis, ut asseritur, collate et donate, contra quoslibet homines ipsos ratione ipsius possessionis vel aliqua eius parte inpetere, inquietare et molestare volentes in iudicio et extra iudicium conservare, ubique expedire assumpmimus, promittimus et pollicemur, ubi vero in casu ipsum Gothhardum vel suos heredes in ipsius possessionis dominio conservare et ab inquietatione adversariorum ipsorum conservare et defensare nequiverimus, extunc eidem Gothhardo et suis heredibus aliam possessionem, prelibate possessioni Pathwary ad similem et equalem dare et donare debebimus et tenebimur effective harum litterarum nostrarum testimonio. Datum in Sopronio, feria quinta proxima ante festum Beati Galli confessoris, anno Domini millesimo trecentesimo septuagesimo secundo, [1372. okt. 14.]||
eidem comiti Iacobo presentasset, pro eo ipse ad octavas festi Epiphaniarum Domini tunc venturas ad requisitionem regiam duxisset prorogandam; quia autem dictus Gothhardus ipsa iudicia novem marcarum eidem comiti Iacobo persolvere debens non persolvisset, ideo octavis in eisdem cum dupplo persolvere teneretur; tertia vero ipsarum litterarum, videlicet dicti comitis Nicolai de Zeech prorogatoria octavo die octavarum festi Beati Michaelis archangeli in anno Domini millesimo trecentesimo octoagesimo primo [1381. okt. 13.] exorta manifestasset, quod instrumentalem exhibitionem, quam Gothhardus, filius Petri, de Pathwarych contra dominum Stephanum, abbatem ecclesie Sancti Martini Sacri Montis Panonie et suum conventum iuxta continentiam litterarum eiusdem comitis Nicolai prorogatoriarum in dictis octavis festi Beati Michaelis archangeli super facto dicte possessionis Pathwarych facere, in quo etiam termino idem Gothhardus duas partes iudiciorum novem marcarum dupplatarum in dupplo et sub pena duppli iudici et tertiam partem eorundem iudiciorum sine dupplo parti adverse persolvere debuisset, de regio litteratorio mandato ad octavas festi Beati Georgii martiris tunc venturas [1382. máj. 1.] idem comes Nicolaus simul cum dictis iudiciis duxisset prorogandam; quarta autem et ultima litterarum predictarum similiter dicti comitis Nicolai iudicialis quadragesimo primo die octavarum festi Beati Georgii martiris in dicto anno Domini millesimo trecentesimo octoagesimo secundo [1382. jún. 10.] emanata declarasset, quod dominus frater Petrus prepositus pro domino Stephano, abbate Sancti Martini Sacri Montis Panonie, in suo et conventus nominibus cum procuratoriis litteris ipsorum contra Gothhardum, filium Petri, in dictis octavis festi Beati Georgii martiris quadraginta diebus continuis legitime stetisset in termino coram ipso comite Nicolao prenotato, qui iuxta continentiam litterarum eiusdem comitis Nicolai prorogatoriarum super facto dicte possessionis Pathwarych instrumenta sua exhibiturus non venisset, neque misisset, nec duas partes iudiciorum novem marcarum dupplatarum cum dupplo et sub pena duppli iudici et tertiam partem eorundem iudiciorum sine dupplo parti adverse persolvere debens persolvisset, sed se pro sua non venientia in iudicio consueto et pro non solutione dictorum iudiciorum in dupplo eorundem conmisisset agravari.||
Quibus quidem litteris exhibitis prefatus procurator ipsius domini Stephani abbatis allegasset eo modo, quod, si iuri consonum fore videretur, extunc eundem Gothhardum, filium Petri, ad premissa contra se legittime facere vellet evocari; et quia consuetudo regni prefatum Gothhardum ad premissa evocandum fore dictasset, ideo idem comes Nicolaus amicitiam dicti capituli Iauriensis litteratorie petivisset diligenter, quatenus ipsorum mitterent hominem pro testimonio fide dignum, quo presente homo regius infradeclarandus annotatum Gothhardum, filium Petri, in premissis deliberationem accepturum contra prefatum dominum Stephanum abbatem et suum conventum ad octavas festi Epiphaniarum Domini tunc venturas [1383. jan. 13.] regiam evocet in presentiam et post hec ipsius evocationis seriem cum nomine evocati ad easdem octavas domino nostro regi fideliter rescriberet capitulum Iauriense prenotatum.||
Ipsum igitur capitulum receptis dictis litteris dicti comitis Nicolai iuxta earundem continentiam una cum Paulo Rufo de Kysrouazd, homine regio, ipsorum hominem videlicet Ladislaum plebanum ad infrascriptam evocationem faciendam transmisisset fide dignum, qui demum ad ipsum capitulum reversi eidem concorditer retulissent, quod ipsi in dominica proxima ante festum Assumptionis Beate Virginis in dicto anno Domini millesimo trecentesimo octoagesimo secundo preteritum [1382. aug. 10.] prefatum Gothhardum, filium Petri, de Pathwarych, in possessione Luth vocata ad premissa (contra) annotatos dominum Stephanum abbatem et conventum Sancti Martini Sacri Montis Panonie ad dictas octavas festi Epiphaniarum Domini reginalem evocassent in presentiam.||
Et ab ipsis octavis festi Epiphaniarum Domini ipsa instrumentalis exhibitio partes inter predictas primo iuxta continentias predictarum litterarum dicti comitis Nicolai et demum ipsius comitis Iohannis de Kappla, cui dictus honor interim fuisset collatus, diversis prorogationum cautelis ventilando octavas festi Beati Mychaelis archangeli in anno Domini millesimo trecentesimo octoagesimo quinto preteritas [1385. okt. 6.] attigisset.||
Ad quas tandem octavas prefatus Gothhardus per annotatum dominum Petrum prepositum, legitimum procuratorem dicti domini Stephani abbatis congruis diebus octavarum earundem coram prescripto comite Iohanne expectatus eiusdem in presentiam non venisset, neque misisset, se mediantibus litteris eiusdem iudicialibus in iudiciis aggravari permittendo.||
Quibus quidem litteris exhibitis prefatus procurator dicti domini abbatis ex parte Petri, filii ipsius Gothhardi, in quem mortuo ipso Gothhardo iura eiusdem possessionaria iuxta regni consuetudinem fuissent redacta, per nos in premissis iuris equitatem petierat inpertiri. Et, quia prefatus Petrus, filius Gothhardi, adhuc ad premissa in tribus foris conprovincialibus proclamandus fore videbatur, pro eo amicitiam dicti capituli litteratorie petieramus diligenter, quatenus ipsorum mitterent hominem pro testimonio fide dignum, quo presente homo noster infradeclarandus memoratum Petrum, filium Gothhardi, de Pathwarych in premissis deliberationem et iudicium recepturum ac sua instrumenta exhibiturum, necnon de iudicio unius marce parti adverse satisfacturum contra annotatum dominum Stephanum, abbatem Sancti Martini Sacri Montis Panonie, ad octavas festi Beati Iacobi apostoli tunc venturas [1397. aug. 1.] in tribus foris conprovincialibus publice et manifeste nostram in presentiam faceret proclamari insinuando ibidem, ut, si veniret et in premissis deliberationem et iudicium reciperet, dictaque sua instrumenta exhiberet ac de iudicio predicto parti adverse satisfecerit, bene quidem, alioquin non obstante ipsius absentia et rebellione finem faceremus causa in premissa, prout dictaret ordo iuris et post hec ipsius trine forensis proclamationes seriem cum nomine proclamati ad easdem octavas nobis amicabiliter rescriberet capitulum Iauriense prenotatum.||
A quibus quidem festi Beati Iacobi aposoli, dum discussio seu deliberatio premissorum, necnon premissa instrumentalis exhibitio primo inter annotatum dominum abbatem ab una et prefatum Petrum, filium Gothhardi parte ab altera et tandem dicto domino Stephano abbate de medio sublato et dicta abbatia per dominum nostrum Sigismundum regem domino fratri Dose moderno dicte ecclesie gubernatori collato inter ipsum dominum Dosam et dictum Petrum iuxta continentiam litterarum nostrarum prorogatoriarum variis litium anfractibus pertransitis de termino in terminum currendo ultimo presentes octavas festi Epiphaniarum Domini [1400. jan. 13.] attigisset, tandem ipsis octavis festi Epiphaniarum Domini instantibus frater Petrus prepositus pro annotato domino fratre Dosa cum procuratoriis litteris conventus loci eiusdem in nostram veniendo presentiam litteras vestras super premissis rescriptionales nobis presentavit, in quibus prefatum Petrum, filium Gothhardi de Pathwarych per Thomam dictum Anglandum de K...ch, nostrum et discretum virum dominum Andream presbiterum, plebanum de Daras dicti capituli Iauriensis homines primo sabbato proximo ante festum Visitationis Virginis Marie in dicto anno Domini millesimo trecentesimo nonagesimo septimo [1397. jún. 30.] in Hysbegh ac secundo feria secunda sequenti [1397. júl. 2.] in Galgoch, nec non tertio et ultimo termino similiter litteris in eisdem denotato et subsequenti in civitate Nitriensi, tribus scilicet foris conprovincialibus ad premissa contra ipsum dominum Stephanum abbatem ad dictas octavas festi Beati Iacobi apostoli [1397. aug. 1.] nostram in presentiam legitime proclamatum extitisse conperimus seriose.||
Ad quas quidem octavas festi Epiphaniarum Domini prefatus Petrus, filius Gothhardi per annotatum dominum Petrum prepositum legittimis diebus earundem octavarum coram nobis expectatus in premissis discussionem seu deliberationem recepturus ac dicta litteralia sua instrumenta exhibiturus nostram in presentiam non venit, neque misit se mediantibus aliis litteris nostris iudicialibus exinde confectis aggravari permittendo.||
Dehinc prefatus dominus Petrus prepositus in declarationem huius, ut prescripta possessio Pathwarych nuncupata prefate ecclesie Sancti Martini de Sacro Monte Panonie, per consequensque dicto domino Dose de iure pertinere debeat, quasdam litteras comitis Nicolai de Zeech proclamatorias per ipsum dicto capituli Iauriensi directas, hic in Wyssegrad tricesimo die octavarum festi Beati Georgii martiris in anno Domini millesimo trecentesimo octagesimo tertio [1383. máj. 30.] emanatas, continentes in se inter alia tenorem quarundam octo litterarum, duarum scilicet Bele, tertie Ladislai dominorum, olym similiter regum Hungarie privilegialium, necnon quarte Nitriensis, quinte Wesprimiensis capitulorum ecclesiarum, sexte vero conventus Zaladiensis, septime namque domini Lodovici regis maiori suo sigillo consignate protestatorie et prohibitorie, necnon octave similiter dicti domini Lodovici regis secreto suo sigillo consignate nobis presentavit, quarum prime, videlicet unius domini Bele regis littere privilegialis aurea bulla bullate, anno Domini millesimo ducentesimo sexagesimo tertio, regni autem sui anno vigesimo octavo, quintodecimo Kalendas Aprilis [1263. márc. 18.] emanate tenor exprimebat, quod, cum castrum Kuschen, quod Wyuar nuncuparetur, cum pertinentiis suis donatum monasterio Sancti Martini de Sacro Monte Panonie per predecessores ipsius Domini Bele regis, prout in privilegio eiusdem monasterii contineretur, paulo post pater suus illustris rex ab ipso monasterio recepisset et idem dominus Bela rex postmodum tenuisset conmutationem dicto monasterio nullam dando pro eo, licet abbas et conventus dicti monasterii multoties ipsum dominum Belam regem rogassent, ut aut idem castrum reddere aut pro eodem castro in concambio sibi dignaretur providere, tamen neutrum illorum facere potuisset diversis negotiis regni sui prepeditus, maxime cum idem castrum, quod pro usu suo conservasset, etiam pro conservatione regni sui confiniorum nimis utile haberetur; attendens itaque, quod idem monasterium per Sanctum Stephanum regem fundatum, dominum et predecessorem ac patronum suum, ex speciali dilectione sibi conveniret amplexari et proventus seu possessiones eiusdem magis augmentare, quam diminui, vestigia sanctorum progenitorum suorum imitando ac etiam illud, quod cum ad partes maritimas tempore persecutionis gentis Tartarice ipsum ire extitisset, de pecunia ipsius monasterii octingentas marcas fini argenti recepisset, quas postmodum eidem monasterio refundere nequivisset dicersis causis incumbentibus, ad memoriam revocans premissa, que ab eodem monasterio recepisset, cedere in detrimentum anime sue, nisi in melius per eum reformata existerent, eidem monasterio Sancti Martini in concambium dicti castri Kuschen sive Wyuar et pro satisfactione pecunie recepte per ipsum ab eodem possessionem suam regalem de Wyhel, que alio nomine Regia Villa nominaretur, cum villis et aliis utilitatibus litteris in eisdem denotatis et ad ipsam possessionem Wyhel spectantibus, inter quas scilicet villas dictam possessionem Pathwarych similiter ad ipsam possessionem Wyhel pertinere pacifice continetur, de plenitudine sue gratie, consentiente, donante et approbante omnia et singula predicta karissima consorte sua domina regina, dicto monasterio perpetuo duxisset conferendam sue libertate litteris in eisdem declarata, nec hoc pretermisisset, quod venerabilem virum Fauum abbatem et conventum dicti monasterii Sancti Martini in possessionem premissam per dilectum et fidelem suum magistrum Methmerium, prepositum de Scepes, cancellarium domine regine consortis sue, vice et nomine ecclesie fecisset introduci; mete autem possessionis eiusdem privilegio in eodem seriatim continentur.||
Secunda vero littera, similiter eiusdem domini Bele regis privilegialis littera anno in eodem emanata, inter alia predictam donationem predicte villa Pathwarych in concambium dicti castri per ipsum dominum Belam regem omnimodo prenominato factam fuisse in se exprimebat.||
Tertia siquidem, videlicet predicti domini Ladislai regis littera privilegialis anno Domini millesimo ducentesimo septuagesimo tertio, quarto Kalendas Iulii, [1273. jún. 28.] regni autem sui anno primo emanata tenorem dictarum litterarum privilegialium domini Bele regis aurea bulla consignitarum de verbo ad verbum transscribendo confirmabat et eundem dominum Ladislaum regem collationibus premissis predicto monasterio per sanctos progenitores suos factis plenissimum suum regium consensum prebuisse et assensum denotabat.||
Quarta namque earundem, videlicet prefati capituli Nitriensis in festo Nativitatis Beati Iohannis Baptiste anno Domini millesimo trecentesimo septimo decimo [1317. jún. 24.] emanata declarabat, quod frater Bernaldus de monasterio Sancti Martini Sacri Montis Panonie in presentia eiusdem capituli constitutus in personis domini Nicolai abbatis et conventus loci eiusdem extitisset protestatus, quod, licet ipse abbas et conventus propter tempus impacatum et sevam tiranidem magistri Mathei claudi de Trinchinio possessiones Wyhel, Zeredahel, Pathwarych, Lubo, Debrethe in comitatu Nitriensi, necnon Dyaky, Stara et Palata vocatas cum earum appendiciis partim in eodem Nitriensi et partim in Posoniensi comitatibus sitas, ad idem monasterium, ut dixisset, efficacissimorum instrumentorum vigoribus pertinentes pro tunc pacifice possidere et regere ac ipsis uti non permitterentur, nec possent, quandocunque tamen et quamprimum post redditam a Deo tranquillitatem et pacem, dictamque prenotati Mathei tiramdem terminatam ipsis afferretur facultas, ipsi easdem possessiones suas repetere et requirere ac quevis iura eorum ibi ipsum monasterium tangentia prosequi vellent, unde medio tempore, donec ad premissa optata effective aliquando hora occurreret, ipsum Matheum et alios universos generaliter ab illicita et illegitima predictarum possessionum et earum cuiuslibet ac iurium quorumlibet eorundem in toto aut in parte occupatione, detentione, venditione, inpignoratione, emptione, amissione, sibi, suisque filiis et posteris regie donationis vel quovis alio titulo seu colore perpetuari factione, regiam etiam maiestatem ab ipsarum quibusvis collatione et donatione, aliaque omnifaria de eisdem, earumve qualibet indebita se intromissione ac quocunque modo earundem distractione factis vel faciendis nominibus quibus supra prohibuisset contradicendo.||
Quintaque earundem, ut puta prescripti capituli Wesprimiensis littera tertio die festi Beatorum Philippi et Iacobi apostolorum anno Domini millesimo trecentesimo vigesimo primo [1321. máj. 3.] conscripta enodabat, quod frater Stephanus, capellanus domini Nicolai, abbatis Sancti Martini, cum procuratoriis litteris ipsius et conventus loci eiusdem coram eodem capitulo extitisset protestatus, quod, licet Matheus de Trincinio villam Wyhel, que alio nomine Regia Villa nuncuparetur, cum portu super fluvio Wagh existenti et tributo fori eiusdem ville ac omnibus aliis utilitatibus suis, item villam Lubo similiter cum portu in eodem fluvio constituto et villas Zeredahel ac Pathwarych ad eandem Wyhel spectantes cum omnibus utilitatibus ipsarum et terram Debrethe inter Wagh et Dudwagh existentem, item villam Dyaky et Stara cum omnibus utilitatibus ipsarum usque nunc violenter in preiudicium dicti monasterii Sancti Martini tenuisset occupatas et prefati abbas et conventus propter tempus impacatum ipsa iura eorum prosequi non potuissent, tamen, quia nunc idem Matheus decessisset, ideo quemlibet et quoslibet generaliter et singulariter ab intromissione, occupatione, emptione, detentione, quavis calida subreptione et quavis alienatione, specialiter regiam maiestatem a collatione seu qualibet distractione possessionum predictarum nominibus quibus supra prohibuisset affirmans, quod easdem possessiones et portiones possessionarias idem dominus abbas et suus conventus requirere vellent loco et tempore opportunis et super eisdem efficacia haberent litteralia instrumenta.||
Sexta siquidem ipsarum litterarum, scilicet ipsius conventus Zaladiensis littera, in octavis dicti festi Beati Philippi et Iacobi apostolorum anno in eodem exorta [1321. máj. 8.] declarabat, quod frater Petrus pro eodem Nicolao abbate Sancti Martini, cum procuratoriis litteris ipsius et dicti conventus Sancti Martini ad eiusdem conventus Zaladiensis veniendo presentiam, in persona eiusdem Nicolai abbatis ipsam protestationem et prohibitionem in factis predictarum possessionum et portionum possessionariarum omnino eodem modo facere procurasset, quemadmodum prefatus frater Stephanus facto in eodem fecisset coram capitulo Wesprimiensi supradicto.||
Septima vero earundem, videlicet annotati domini Lodovici regis littera, hic in Wissegrad tertio die festi Beatorum Fabiani et Sebastiani martirum anno Domini millesimo trecentesimo quinquagesimo octavo emanata [1358. jan. 22.] exprimebat, quod frater Siffridus, abbas ecclesie Sancti Martini, ad eiusdem domini regis accedendo presentiam per modum protestationis et prohibitionis sue significare curasset maiestati, quod possessiones Wyhel, Zeredahel, Lubo, Patwarych et Debrethe (predicte) ipsi monasterio et per consequens sibi omni iure et vigore instrumentorum pertinerent, quas quidem vicini et commetanei earundem ac alii nobiles pro se indebite occupando detinerent; unde facta huiusmodi protestatione universos et quoslibet homines et specialiter vicinos et commetaneos earundem ab indebita occupatione et pro se ipsis perpetuatione et quovis modo se intromissione in easdem facta vel facienda coram ipso domino rege prohibuisset.||
Octava namque tandem et ultima eiusdem domini Lodovici regis secreto sigillo vallata continebat hunc tenorem:||
Nos Lodovicus, Dei gratia res Hungarie, tenore presentium significamus, quibus expedit universis, quod venerabilis et religiosis vir dominus Ladislaus, abbas monasterii Sancti Martini de Sacro Monte Pannonie, dilectus nobis et fidelis, nostre maiestatis adiens conspectum aures celsitudinis nostre humiliter propulsavit, quod predictum monasterium, suum per nonnullos regnicolas possessionibus et possessionariis iuribus suis, quibus per sanctos reges, pios nostros progenitores estitit donatum, occupate, forent, defraudatum et frustratum, supplicans nostro culmini humili precum instantia, ut easdem possessiones et possessionaria iura dicti sui monasterii tam apud maiestatis, quam aliorum quorumpiam manus existentes et habita per formam iuridicam liberam sibi et suo conventui recaptivandi et acquirendi de benignitate regia facultatem annuere dignaremur. Nos itaque ex innata cordi nostro pietate, que petentibus se liberam exhibet et benignam iustis et legitimis supplicationibus eiusdem domini Ladislai abbatis favorabiliter inclinati predictas possessiones et possessionaria iura dicti sui monasterii modo quo supra ab eodem alienata tam apud nostras, quam apud aliorum quorumpiam manus habitas et existentes, cuiusvis nominis vocabulo vocitatas iuridice recaptivandi et reacquirendi liberam sibi et dicto suo monasterio ac conventui annuimus facultatem harum sub testimonio litterarum nostrarum, prescriptione aliquali eidem domino abbati et suo monasterio ac conventui in aquisitione possessionum et possessionariorum iurium suorum predictorum obviare non valente. Vobis itaque palatino et iudici curie nostre, vestrasque vices in iudicatu gerentibus ac aliis quibuslibet iudicibus et iustitiariis regni nostri nunc et pro tempore constitutis firmis damus in preceptis, quatenus, dum predictus dominus Ladislaus abbas et suus conventus prescriptas possessiones et possessionaria iura dicti sui monasterii coram vobis acquisierint et fuerint prosecuti, eisdem favorem, amorem (!) et odio quorumpiam postergatis iudicium et sufficiens iustitie conplementum iuxta formam prescripte nostre gratie exhibere debeatis iuris ordine observato; aliud contra nostram gratiam non facturi. Datum in Wissegrad, in festo apostolorum Petri et Pauli Beatorum, anno Domini millesimo trecentesimo sexagesimo septimo. [1367. jún. 29.]||
Quarum quidem litterarum exhibitionibus factis iam nominatus procurator ipsius domini fratris Dose eidem per nos in premissis iuris medelam postulavit inpertiri. Unde, licet memoratus dominus Lodovicus rex pretitulatum Gothhardum, filium Petri dicti de Zala, patrem ut puta pretaxati Petri in causam attracti in dominio preallegate possessionis Pathwarych in causis prescriptis conservare et ab omnibus expedire assumpsit et premiserit, tamen, quia prenominatus dominus Bela rex in preallegato anno verbi incarnati millesimo ducentesimo sexagesimo tertio inter alias possessiones per ipsum antefato monasterio Sancti Martini ordine prenominato concambialiter traditas predictam possessionem Pathwarych eidem monasterio cum suis utilitatibus perpetuo contulisse, Favumque tunc abbatem et concentum eiusdem monasterii in dominium ipsius possessionis legitime introduci, metasque ipsius erigi fecisset, post hec etiam iam dictus dominus Ladislaus rex in dicto anno Domini millesimo ducentesimo septuagesimo tertio premissam collationem annotati domini Bele regis dicto monasterio Sancti Martini per eundem factam ratificasse et eidem suum consensum prebuisse, sequenter etiam primo in dicto anno Domini millesimo trecentesimo septimo decimo et secundo anno verbi incarnati millesimo trecentesimo vigesimo primo, tertio vero in suprascripto anno Iesu millesimo trecentesimo quinquagesimo octavo prescripte protestationes et prohibitiones ratione eiusdem possessionis Pathwarych pro parte eiusdem monasterii Sancti Martini et abbatum eiusdem facte extitisse, ultimatim etiam in dicto anno Domini millesimo trecentesimo sexagesimo septimo suprascriptus dominus Lodovicus rex preallegato domino fratri Ladislao abbati ipsius monasterii Sancti Martini tales possessiones et iura possessionaria, que ab eodem monasterio alienata haberentur, apud suas vel aliorum quorumpiam manus habitas, cuiusvis nominis vocabulo vocitatas, prescriptione aliqua in aquisitione huiusmodi possessionum et iurium possessionariorum obviare non valente, iuridice requirendi et recaptivandi liberam facultatem annuisse, palatino igitur et iudici curie sue, aliis etiam regni sui iudicibus eidem abbati super premissis iudicium facere demandasse, nichilominus etiam iam nominatus Gothhardus, filius Petri dicti de Zala, tam ad exhibitionem aliorum instrumentorum suorum, si que in facto ipsius possessionis Patwarich, demptis exhibitis, habuisset confecta, quam etiam ad habendam deliberationem in premissis venire vel mittere non curasset et ideo primo idem Gothhardus evocatus, postremoque pretaxatus Petrus, filius ipsius Gothhardi, in tribus foris conprovincialibus publice proclamatus se in terminis prescriptis eis deputatis semper convinci permisisse ex omnibus preassumptis clare et perspicue adinveniebantur, consuetudinaria vero huius regni lege ab antiquo aprobata requirente quicunque in facto alicuius iuris possessionarii per quempiam recaptivati se instrumenta habere allegando exhibere rennuerit aut si huiusmodi sua instrumenta per ipsum exhiberi assumpta exhibendo ad habendam deliberationem facto super eodem in presentia sui iudicis ordinarii accedere vel mittere recusaverit, sicque primo evocatus et tandem sua contumacia requirente in tribus foris conprovincialibus proclamatus se semper convinci permiserit, talis ipso iure possessionario privati solet et destitui; requisitor vero ipsius in dominium eiusdem contradictione huiusmodi contumacis et aliorum quorumlibet non obstante statui debet atque introduci: pro eo vestram amicitiam petimus diligenter, quatenus vestrum mittatis hominem pro testimonio fide dignum, quo presente magister Nicolaus de Saagh vel Petrus de Castroferreo, nostri notarii, alio absente homo noster de curia regia ad id specialiter destinatus ad faciem annotate possessionis Pathuarich vicinis et commetaneis suis universis inibi legitime convocatis et presentibus accedendo statuat et committat eandem memorato monasterio Sancti Martini et per consequens dicto fratri Dose, eiusdem gubernatori, eo iure, quo eis ex premissis dinoscitur pertinere cum omnibus suis utilitatibus et pertinentiis quibuslibet iure perpetuo et irrevocabiliter possidendam, tenendam et habendam, contradictione prefati Petri, filii Gothhardi et aliorum quorumlibet previa ratione non obstante; et post hec ipsius possessionarie statutionis seriem, ut fuerit expediens, ad octavas festi Beati Georgii martiris nunc affuturas [1400. máj. 1.] nobis amicabiliter rescribatis Datum in Wissegrad, quinquagesimo die octavarum festi Epiphaniarum Domini predictarum, anno eiusdem millesimo quadringentesimo. [1400. márc. 3.]