Nos conventus monasterii Beati Michaelis archangeli de Chorna memorie con[mendam]us, quod religiosus vir frater Egidius, custos monasterii Sancti Martini, Sacri Montis Pannonie, nominibus et in personis venerabilis patris domini fratris Dose, gubernatoris abbatie dicti monasterii Sancti Martini et conventus loci eiusdem ad nostram veniens presentiam per modum protestationis et prohibitionis nobis significare curavit, quomodo magnificus Ladislaus de Palatha et Stephanus, frater eiusdem, hiis diebus preteritis quasdam possessiones dictorum Dose gubernatoris et conventus monasterii Sancti Martini Sacri Montis Pannonie Wyhel, Lubow et Debrethe vocatas, in comitatu Nitriensi existentes, cum omnibus earum utilitatibus tacita veritate et suggesta falsitate a serenissimo principe, domino nostro Sigismundo, Dei gratia rege Hungarie, ipsis dare, donare et conferre procurassent in preiudicium dictorum domini fratris Dose et (!) gubernatoris ac conventus monasterii Sancti Martini Sacri Montis Pannonie valde magnum. Unde facta huiusmodi protestatione memoratus frater Egidius custos nominibus, quibus supra, prefatum dominum nostrum, dominum Sigismundum, Hungarie etc. regem, a donatione et collatione ac perpetuatione prefatarum possessionum Wyhel, Lubow et Debrethe predicti monasterii Sancti Martini Sacri Montis Pannonie et quarumlibet utilitatum earundem, item prescriptos Ladislaum de Palotha et Stephanum, fratrem eiusdem ac alios quoslibet ab usu, emptione, occupatione et sibi ipsis appropriatione ac statuifactione predictarum possessionum Wyhel, Lubow et Debrethe vocatarum et quarumlibet pertinentiarum earundem, fructuumque et utilitatum perceptione, seque in dominium ipsarum intromissione qualitercunque factis vel faciendis nominibus predictis prohibuit contradicendo et contradixit inhibendo coram nobis harum litterarum nostrarum testimonio, vigoreque mediante. Datum ipso die festi Beati Clementis pape, anno Domini millesimo quadragesimo (!) primo. [1401. nov. 23.]